Хаан цадиг үргэлжлэл

Дан ганц үг биш хэллэг, хэлц үг бичиж тэмдэглэж авчээ. Түүнийгээ үгтэйгээ хамтатгаад орууллаа шүү.

Сул үг салхинаас хурдан.

Эр цэрэг журамтай бол Эзэнт төр бөх.

Тос дотроосоо өтнө гэгчээр дайсан маний дотор байж.

Эвийг эвдвэл эцгийн нэрийг гутаана.

Орог шунхан үүрээр. За энэ орог гэдэг үгийг Бэзгийн Явуухулан гуайн "Би хаана төрөө вэ" шүлэгний ...Орог саарал зэрэглээ хавар сүүмэлзэх хөндийд... гэж ирээд л уншиж, цээжилж байлаа. Яг таг утгыг нь мэддэггүй явж. Сая албаар хайж үзлээ. 

Галт ус хүний муухайг уудлана. Муухайгаа уудлуулсан хүн мунхгийг үйлдэнэ. Хар ус балгасан хүн хамаг мууг үйлдэнэ. Хамаг мухайг үйлдсэн хүн ханилах нөхөргүй болно. Чингис хаан дүү Бэлгүтэйгээ зэмлэсэн үг. Ахдаа үнэнч, хүндэлдэг болохоороо энэ зэмлэлийг нь чандлан сахина.

Согос: Нэгэн төрлийн загас. Сугас. Сугас гэдэг нь бас нэгэн төрлийн загас гэж байна. 

Зүлд: 3 утгатай. Туужид бөөр зүлд, алаг нугалуур гэж гарсан. Эхний утга болох алж төхөөрсөн мал, агнасан амьтны толгой, багалзуур, уушги зүрхийг үргэлж авсан нь гэдгээрээ оржээ.

Шузга: Хоёр шонгийн хооронд сур тэлж татсан морины уяа гэж байна. Хань ижлээсээ асууж үзнэ ээ. Багадаа адууны дэлэн дээр өссөн хүн. Мэдэж багад. 

Гэснээс би иймэрхүү монгол ахуйтай холбоотой үг хэллэгээ хань ижлээсээ асуудаг. Хэ хэ. Заримдаа яах гэж хотын хүүхэн авч суусан юм бэ? гэж цаашлуулна аа. Ккк 

Хариглах: 2 утгатай. Яг ямар утгаар орсныг нь эргээд номноосоо хайх гэсэн залхуу хүрчихлээ. Хэ хэ. Юмаа харамлах, бусдыг хажиглах. Нөгөөх нь Хариг гарах, хариг тогтох гэнэ ээ. Хариг гэдэг үг нь юу билээ? Тольдох уу? Яах уу? Гялс хариу. Хэ хэ. 

Хариг гэдэг нь чих, хамар, улаан хоолой, мөгөөрсөн хоолой зэрэг хөндий эрхтэн, нүд, мах, булчинд элдэв биет юм орсон нь, оргол гэсэн утгатай гэнэ ээ. 

Цахдах: Цахаар юмыг тулах, цахад юм өлгөх гэнэ. Цах гэдэг нь 2 утгатай. Эхний утга нь юмыг өлгөх, тулах ацтай мод. Жишээ нь айргийн цах, модон цах гэх мэт. дараагийн утгыг нь хэлэхгүй, та нар өөрсдөө олж мэд. Хэ хэ.

Ааглуу: Ид чадал, омог сүрээр бусдаас илт давуу. Мөн хурдан гэсэн утгатай. Жишээ нь бяраар ааглуу, ааглуу хүлэг гэх мэт.

Зүгсэрүүлэх: Хайгаад олоогүй. Гэхдээ хүн, амьтныг ажил, уналга эдэлгээнд сургах гэсэн зүгшрүүлэх гэдэг үгний нэг хувилбар байх гэж бодов. Номонд морь зүгсэрүүлэх гэж гарсан тул тэгж бодсон бөлгөө.

Талбиун: Талбиу гэдэ үгтэй утга ижил. Талбиу гэдэг нь тавиу, багтаам сайтай, өргөн уудам, сэтгэл санааны уужим тайван байдлыг илэрхийлсэн үг гэнэ. Урд хаа нэгтээгээс уншиж байсан. Энэ удаад нягталж үзмээр санагдсан тул. Талбиун нутаг гэж номд гарсан. 

Талбиу ухаан гэж хэлдэг гэнэ. Блог нэрээ өөрчилчихмөөр ч юм шиг. Хэ хэ. 

Алхаг: 4 утгатай. Номд болохоор 3 дахь утгаараа орсон. Ажилд залхуу хойрго, салан задгай. Заваан бохир. Ажил явдал замбараагүй, хэлэх ярих хамаагүй, ёс журам үл мэдэх.

Үг үсгийн алдаа олж молоод л. Жишээ нь нүглийг, сүргийн гэх мэт үгийг эгшиг гээлгүй бичсэн байх юм? Хэвлэлийн алдаа? нэг бол хэвлэлтэд бэлтгэгчийн алдаа? Мэдэхгүй юм дөө.

Би ч бас эндээ зөндөө алдаад биччихсэн бaйдаг, сүүлд унших нь ээ. Хуучин блогоо орж засаж чадахгүй. Нууц дугаараа мартсан тул. Харин энэ хоёр дахийгаа харин засаж болох байх. Алдаа олдвол шүү дээ.

За нэг иймэрхүү. Уншиж дуусаагүй. Үлдсэн сонь содон үг түүвэл бичнэ ээ. Алхаг залхаг зан гаргалгүйгээр, бичихийг хичээнэ ээ. Хи хи.

Түр баяртай. Амжилт шүү...