Гялгар уут

7 сарын 1-нээс бүх дэлгүүрийн гялгар уут төлбөртэй болсон. Том нь 5 иен, жижиг нь 3 иен.

Нэлээд дээхнээс хэсэг дэлгүүрүүд уут нь үнэтэй болсон л доо. Хэсэг дэлгүүр нь үйлчлэгчээ татахын тулд үнэгүй уутанд хийж өгдөг байсан юм. Энэ жилээс бүх төрлийн дэлгүүр уутаа үнэлсэн. Хуванцар хогны хэрэглээг багасгах гэсэн зорилготой. Монголд ч бас төлбөртэй болсон гэж сонссон.

Гэрийн минь гялгар уут овоо цэгцрэх янзтай болоод явчихлаа. Үнэгүй өгдөг газраас авсан уутнуудаа хаяхгүй хадгалаад л байдаг, хадгалаад л байдаг. Хэрэг болно гэж бодоод. Хаяж чаддаггүй. Гоёоос нь монгол руу бэлэг энэ тэр хийгээд явуулчихдаг. Хэ хэ.

Гялгар уутны хэрэглээ ер нь асар их юм аа.

Бага зулзага өдөр бүр нэгийг авч явна. Хоол идэхдээ хэрэглэсэн нойтон алчуур, хормогчоо хийж ирдэг. Дунд зулзага мөн бассейны хичээлтэй өдрөө гялгар уут авч явна. Норсон усны хувцас, алчуур зэргээ хийж ирдэг.

Өдөртөө хэрэглэсэн уутыг нь хаячихдаг байлаа. Гэрт хагалсан уут цөөрөөд ирэхээр нэг уутаа угааж хатаагаад дахин хэрэглэдэг юм билүү? гэж бодож байна. Гэхдээ цөөрөөд ирэхээр нь. Тэгж гэрийнхээ гялгар уутыг цөөлнө өө. Цөөлөх гээд цөөлж чаддагүй зүйлийн минь нэг шүү дээ.

Хэмнэх зорилготой над шиг хүнд даавуун тороо мартах үе гарна аа. Ялангуяа санамсаргүй  явж байгаад худалдаа хийх үед. Түүнээс зориод гарахдаа бол тороо байнга авч явна л даа.

Ганцхан удаа уут авахад 5 иен, бага мөнгө шиг санагдах ч дуслыг хураавал далай гэдэг шиг. Дэлгүүр орсныхоо тоогоор 5 иен цааш нь хийж үздэг юм билүү? Хэдэн жилийн дараагаар овоо хэдэн цаас хураах байх даа, тийм ээ?

Цаасан тор бас зөндөө хадгална. Хүмүүст ойр зуур бэлэг өгөхдөө хийнэ. Бэлэг гэдэг нь сүртэй зүйл биш шүү. Хань ижлийн агнасан загас, хураасан жимс гэх мэтээсээ хөршийнхөндөө бэлэглэх зэрэгт ашиглана.

Цаасан уут бас төлбөртэй болсон газар байна лээ. Арвилан гамнаж, хэмнэж хэрэглэнэ ээ. Та бүхэн ч гэсэн ирээдүйгээ, байгаль орчноо бодон бодон хэмнээрэй.

Бүгдэд нь амжилт...