Урлан

Нэг хэсэг охидынхоо зурсан зурагны зургийг их оруулдаг байсан тийм ээ? Нүүр номдоо ч тэр, блогтоо ч тэр.

Сүүлийн үед охид нэг их зурахаа ч байж, ганц нэг зурсныг нь би тоохоо ч байж. Хэ хэ.

Гэтэл бага зулзага үргэлжлээд зурж эхлэх гэж байна. Одоохондоо хүмүүсийг зур гэж шаардаад. Өөрөө зурсныг нь харж баясаад л сууж байна. Зурдаг эгч нар хөөрхөн амьтан энэ тэр зурж өгнө өө.

Ээж л жаахан асуудалтай. Одоогоор балчир юм болохоор, зурсан болгон минь таалагдаж байна. Алга ташиж энэ тэр. Хо хо.

За энэ ногоон өнгийн тосон харандаагаар зурсан нь ээжийн бүтээл. Шувуу. Ха ха. Харин хажуугийн бүдэг ягаан нь аавын бүтээл. Тоторо зурсан нь. Жаахан сонин болчлоо гэсэн. Намайгаа бодвол зурчихдаг хүн...

Дунд зулзага зурсан. Шаал өөр байгаа биз дээ? Хөөрхий минь хичээл ном, дугуйлан секц гээд зурах зав нь гарахгүй ээ. Харин дүүгээ цаас дэлгээд суухаар, гүйж ирээд ямар нэгэн юм зурж өгчихөөд байгаа. Ээждээ үглүүлнэ ээ, үгүй ээ чи минь даалгавараа хий гэж...

Манайхаар дүүрэн цагаан цаас. Хаях гэж байсан хуанли энэ тэрийн цаасыг цуглуулчихдаг. Тэгээд оройдоо, амралтын өдөр ингэж том том цаасаа дэлгэж байгаад зурдаг. Аминдаа ээжийн нэг арга барил. Зургийн хичээл, дүрслэх урлагийн хичээлд түүртэлгүй, өөрийгөө болгочихдог болох. Би чинь багадаа их түүртдэг байсөөн. Зурдаг хүмүүсийг гуйж энэ тэр. Хэ хэ.

Гэснээс солгой гар нь их явах юм аа, багын минь. Баруун гарт харандаа, халбагыг нь бариулаад л байгаа. Солгой хүн гарч энэ тэр...

За тэгээд бүхий л насны зулзагатай ээж аавуудад амжилт хүсье ээ. Бидний ирээдүй бидний гарт. Цагаахан цаасыг хэрхэн яаж хүмүүжүүлэх ч бидний гарт. Хи хи.