Алтан долоо хоног

Алтан долоо хоног болж байна. 4-5 хоног үргэлжилдэг амралт. Өмнөх бичлэгт бичэн дээ.

Үндсэн хуулийн өдөр, ногоон? өдөр, хүүхдийн баяр гэсэн баярууд дарааллан тохионо. Хэрэв тэр баярууд нь бүтэн сайн өдөр таарвал нөхөөд ажлын өдөр үргэлжлээд амарна.

Уламжлалт ёсоор бол хүмүүс гадаадад аялах, дотооддоо аялах, хөдөө орон нутаг дахь ээж аавдаа очих гэх мэтээр өнгөрөөдөг.

Харин энэ жил гэртээ байхыг, орж гарахгүй байхыг уриалж, хүсэж, шаардаж байгаа тул аялал жуулчлалын компаниуд, зочид буудлууд, хоолны газрынхан хэцүү л байх шиг байна.

Бид бас жил бүр уул явдаг даа. Энэ жил явж чадаагүй ээ. Гэр зуураа бужигнаад л, гарахаар бол гарч гэрээ нар зөв гурав тойрчихоод л орж ирж байна. Ха ха. Хүнсээ хань ижил бидэн хоёр ээлжилж гарч цуглуулна. Авдаг хүнс минь ч тоотой...

Гэрээ гурав тойр зугаалахдаа ганц нэг цэцэгтэй таарч зураг дарсан шиг л явж байна. 

Гэрийн гадаах цэцэг. Цээнэ цэцэг шиг санаж байна. Хүний урманд би ерөөсөө арчлахгүй юм дөө. Юун цэцэгтэй манатай. Бүхэл бүтэн хүн арчлаад завгүй байхад. Хань ижил л хааяа зэрлэгийг нь зулгааж харагддаг юм.

Бага зулзагын шив шинэхэн цэцэрлэгийн цонхны тавцан дээрх цэцэг. Цонх нь нээх хөөрхөн доор байрлалтай. Жаахан маамаа нар түшиж зогсоод л аан уун гэж заагаад хорвоотой танилцаж байна.

5 сард энд тэндхийн цэцгийн хүрээлэнд алтан зул цэцэг дэлгэрээд, өнгө алаглаад ёстой сайхан, дур булаам байдаг юм. Харамсалтай нь олон хөлийн газрууд хаалгаа барьсан байгаа тул, юун цэцгийн хүрээлэн орж нүдээ баясгах. Айлын хашааны гадаа ургасан ганц нэг цэцгийг харж л мэлмийгээ болон зүрх сэтгэлээ баясгаж байна дөө.

Аль болох эерэг зүйл харж, сонсож, ярьж дархлаагаа дэмжиж байна. Зурагтаар гялс мэдээ сонсоод л болоо. Суугуул нутагт минь халдвартай хүн гурав байна. Нэмэгдээгүй, ашгүй. Нэмэгдэхгүй байж цаг хугацаа хожоосой гэж залбираад л сууж байна.

Монголчууд минь хичээгээрэй. Итгэл, найдлага минь шүү эх орон минь...