Багахан зулзага

Алхаад сүйд. Энд тэнд яваад, элдэв зүйлд гар нь хүрээд. Нүдээ салгахгүй, ширтэж байхгүй бол болохоон байж байна. Маажийсан хөлийг нь харахаар хайр хүрнэ. Би майга гэдэг нэг шүлэг байдаг даа. Тэр л санаанд ороод байгаа, араас нь хөлийг нь харахаар. Ккк

Шинэ цэцэрлэгтээ дасаж л байна. Өглөөдөө уйлах нь багассан. Баяртай гэж үлдэх өдрүүд нэмэгдэж байна. Дунд нь нэлээд хэдэн өдөр амарчихвал харин уйлна шүү. Ижий рүүгээ тэмүүлээд. Өрөвдөнө гэж юүхэв.

Өөрийн хүссэн зүйлд гар нь хүрэхгүй бол, авах гэсэн зүйл нь ямар нэгэн зүйлд тээглээд авагдахгүй бол аан аааан гээд орилно. Аваад өгөөч ээ гэж байгаа нь тэр.

Хөөрхөн хөөрхөн эрдэм сурсан. Надаа гэж хоёр гараа тосно. Баярлалаа, уучлаарай, болгооно уу гээрэй гэхээр хальт тонголзоно. Цэцэрлэгээс сурч буй эрдмийн нэгт япон хэлийг сүрхий ойлгоод байдаг шүү.

Сайхан хооллоорой, сайхан хооллолоо гэх мэт үйлдлүүдийг сайн хийнэ. 2 гарын алгыг нийлүүлж ирээд л толгойгоо хальт мулт хөдөлгөнө. Хэ хэ.

Хоолоо өөрөө халбагадаж идээд эхэлсэн. Мэдээж асгана цутгана. Их тэвчээртэй хандаж байгаа. Тэгж байж л сурах юм чинь. Гэхдээ одоогоор мэдээж том хүний туслалцаа хэрэгтэй тул хааяа халбагадаж өгнө.

Эгч нар нь өхөөрдөд заримдаа ч залхтал нь эрдмийг нь хийлгэнэ. Өнөөх нь уурлаж харагдана. Заримдаа тоохгүй, өөр зүйлд анхаарал нь явна.

Ихэнх харилцан яриа япон хэлээр явагдаад байна. Ээж л хамгийн идэвхитэй монгол хэлээрээ ярина. Монгол хэлээр ном уншиж өгнө. Үүний ачаар аав аа, мөөмөө, аниа, ээж ээ гэдэг үгсийг их ойлгомжтой дөхүүлж хэлж байгаа.

Хамгийн эгдүүтэй нь хүн панаалдаж сурч байна. Хэн заагаад өгчихдөг юм бүү мэд. Малийж ирээд л.

Долоовор хуруу бол маш идэвхитэй. Харсан зүг рүүгээ заагаад л, за тэр долоовор хуруу заасан зүг бол сөрж болохгүй айлдвар. Хэ хэ. Аав л хамгийн их өртөнө дөө, тэр тушаалд. Хи хи. Элэг барихад амархан хүн шиг байгаа юм. Ккк.

Гэснээс өнөөх ботгоны дуугаа сонсохоор уйлдаг хэвээрээ. Гэрийнх нь хэн нэгэн дуулж өгөхөөр уйлахгүй л дээ. Жаахан сонин болно. Харин ютүбээс жаахан хүүхдийн дуулсныг нь сонсгохоор учиргүй өмөлзөж ирээд, нэг тийм сонин чин сэтгэлээсээ уйлаад байгаа.

Аан тийм сармагчин үе дээрээ явж байгаа. Дунд зулзага бас их сонин сонин хөдөлгөөн зааж өгөөд, өнөөх нь даган дуурайна. Саяхан тахиа болж байна гээд нэг гараа толгой дээрээ, нэг гараа нуруундаа аваад алхсан чинь дагаж хийгээд алхаад байсан. Бөөн эгдүү. Нэг гараа өргөчихөөд л, нуруундаа авах гар бол арай л чадахгүй, зүгээр л хажуудаа. Хэ хэ.

Гэх мэтчилэн оройд багыгаа тойрон баясаад л, бужигнаад л нэг мэдэхэд унтах цаг. Хүүя хаая гээд орондоо. Тэгээд л нэг мэдэхэд өглөө...