Идэшний улирал

Идшээ төхөөрцгөөсөн үү? Ижий аав минь овоо хэдэн төгрөгний идэш авсан сурагтай. Нэг дор их мөнгөний тоо сонсоод би ч махнаас гарцгаа гэж илүү үглэв. Ха ха. 

Яахав нэг бэлдчихсэн байхад ирэх жилийн идэшний улирал хүртэл дэлгүүрээс мах худалдаж авдаггүй, тэр утгаараа хэмнэлттэй гэж тэд минь тайлбарлаж, би ойлгов. Хи хи.

Бид яаж дутахав. Идшээ төхөрөөв. Гэхдээ байгалийн хишгийг хань ижлийн ур чадвараар л хүртэж байна өө. Зэрлэг гахай, буга зэрэг амьтад нь газар тариалан эрхэлдэг иргэддээ үе үе ихээхэн төвөг учруулдаг учраас энд агнадаг. 

Мэдээж тусгай зөвшөөрөлтэй хүмүүс агнана. Зөвшөөрөл авна. Хань ижил багадаа тарвага зурам агнаж байсан нь ихээхэн ашигтай байна өө. Хи хи. 

Мөн хонь ямаа муулчихдаг нь эдний гайхшралыг төрүүлнэ, зарим нэг нь бүр биширчихсэн явна лээ. 

Зэрлэг гахайн мах чанаад шөлөнд нь ногоо чанаад идэхэд тун дажгүй шөл гарна. Будаагаа агшаагаад хамт иднэ. Будаагаа шөлөнд нь чанахаар зулзагууд онцгүй гээд байдаг юм. 

Тэгэхээр будаагаа агшаагаад тусад нь аягалаад иднэ. Хань ижил бидэн хоёр будаагаа шөлөндөө хийгээд иднэ. Багадаа юу идэж өссөн нь их нөлөөлнө. 

Бугын махыг татаад, худалдааны татсан махтай холиод мөн бас бус ногоотой холиод бууз, хуушуур, банш хийж идэхэд дажгүй. Бугын мах өөхгүй тул дажгүй зохицдог. 

Монгол хоолоо цөөн хийж иднэ ээ. Гурил зуурч, элдэнэ гэдэг ч ай даа цаг их орно оо. Тийм үү? 

Идэш гэснээс адууны мах, умс китай идмээр санагдаж байх чинь вэ? 

Энэ удаагийн хуушуур маань их царайлаг болсон. Хагараагүй, хиншүү гараагүй, түлэгдээгүй.

Заримдаа ч царай муутай хуушуур болчихдог юм. Гуриландаа байна уу даа гэж бодсон. 

Зочид минь ч сэтгэл дүүрэн байсан. Харихдаа тэрэндээ, энэндээ гээд хорин хэдэн хуушуур авч харьсан. Ха ха. 

Жаахан зайтай амьдардаг эмээдээ л гэнэ, ирээгүй хоёр хүүдээ л гэнэ, бас маргааш өдөр нь өөрөө халааж идэхээр л гэнэ. Эмээ нь 90 гарчихсан мөртлөө ганцаараа амьдардаг, бүх юмаа өөрөө хийдэг, гэхдээ амралтын өдрөөр очиж хамт ойр зуурынх нь гэрийн ажилд нь тусалдаг юм. 

Ануухан байхад нь буюу хэдэн жилийн өмнө бид ч уулзаж учирдаг байсан. Ногоо тарина, гадаанаа ганц нэг жимсний модтой. Одоо ч ногоогоо тариад л, тараагаад л хэвээрээ байна лээ. 

Хүүхдүүд нь томроод ээж аавтай хамт айл хэсэхээ байсан тул манайд  ирээгүй. Харин хуушуур авч ирээрэй гэж захисан гэсэн. Хо хо. 

Дараа өдрийнх нь зочиддоо бууз жигнэж өгсөн. Тэгсэн хуушууранд ч дуртай гэж авсан. Дараа хуушуур хайрч өгнө дөө...

Түр баяртай. Бүгдэд нь амжилт хүсье.