Ядаж байхад яр

Хувийн асуудал гэх үү? Ар гэрийн асуудал гэх үү? Юм юм л болж байна.

7 хоногийн өмнө, бага зулзага баасан гарагийн оройноос бага зэрэг бүлээрээд, бага зэрэг нус нь гоожив. Хагас бүтэн сайнд нь сайхан амраагаад, нэгдэхэд нь албандаа явсан.

Нэгдэхээс нь бусад гишүүд нус нь гоожив. Дунд зулзага сургууль дээрээ бага эрэг сонин болоод, тамирын хичээлдээ суугаагүй гэв. Маргааш нь хичээлээсээ чөлөө авч амрав. 

Халуун байхгүй мөртлөө бие нь нэг л сулбайгаад байсан. Нэг өдөр сайхан амраагаад, маргаашнаас нь хичээлдээ явав. 

Үлдсэн хоёр томчууд яасан гэхээр? Миний нус нэг өдөр задгай гоожсон. Халуун байгаагүй. Хань ижил бас нус нь гоожоод, халуун байхгүй...

Суугуул хотод минь "ко" гуай ихсээд, манайхтай ойртоод л байгаа сураг дуулдсан.

"Доор бичих үйл явдал нь бага зулзага бага зэрэг бүлээрсэн өдрөөс хойшхи 7 хонгийн үйл явдал шүү."

Цаг хугацааны асуудал л байсан тул, өнгөрдөг баасан гарагаас эхлүүлээд бага зулзагын цэцэрлэг амрав.

Хэн нь мэдэгдэхгүй, ямартай ч цэцэрлэгийнхнээс нэг нь тусаад, эерэг гараад. Пүрэв гарагийн бүр орой 22 цаг хавьцаа нийтэд нь мэссэж бичсэн байв. Хагас бүтэн сайн, нэгдэх, хоёр дахид амрана гэж байсан цэцэрлэг нь ээж аав нь амарч чадахааргүй, яалт ч үгүй хэцүү байгаа айл гэрийн хүүхдүүдийг нэгдэхээс нь авна гээд ажилласан. 

Би ч амралт байсан тул яаран өгсөнгүй. Хоёр дахид ч амрана гэж байсан цэцэрлэг хоёр дахь буюу мягмар гарагаас хэвийн үйл ажиллагаагаа эхэлсэн. Би өөрөө амрах байсан ч зулзагаа өгчихсөн. Энэ нь бас учиртай.

Энэ хооронд цэцэрлэгээс байсхийгээд л мэссэж ирнэ. "Төвөг удаж байгаад уучлаарай. Ойрын хавьтал болсон, шинжилгээ өгөх шаардлагатай хүүхдэд дор бүр нь мэдэгдэнэ ээ. Хотын эрүүл мэндийн газрын заавар зөвлөмжийг даган ажиллаж буй тул дараагийн мэссэж очих хүртэл түр хүлээнэ үү?" 

Гэх мэт агуулгатай. 

Бид азаар ойрын хавьтал биш байсан, шинжилгээ өгөөгүй. Бие хаа нь ч зүгээр байсан. 

Өөрөө амрах байсан ч зулзагаа албанд нь өгсөн гэсэн дээ. Яасан гэхээр? Хань ижил өвдсөн. Нуруу нь өвдөөд, хагас сайнаас эхэлж өвдсөн нуруу нь хэвтэж өнжөөд ч зүгээр болоогүй тул нэгдэхэд нь ажил дээрээ очиж нэг үзэгдчихээд, эмнэлэг явж тариа хийлгэсэн. Өвчин намдаах эм авч уусан. Эдгээгүй...

Хоёр дахь боллоо, нуруу нь улам өвдөөд болдоггүй. Нэг бариач эмгэн дээр очиж бариулж, иллэг хийлгэв. Зүгээр болоогүй...

Гурав дахийн өглөө. Нурууны өвдөлт улам гаарав. Өөр эмнэлэг орж, их хүчтэй, их өвддөг тариа хийлгэхээр болов. 

За энэ хооронд урд шөнө нь бага сургуулиас мэссэж ирсэн байв. Бас л хэн нь мэдэгдэхгүй, эерэг гарсан тул, гурав дахид амрана. Дахин мэссэж явуулах тул, үе үе шалгаарай гэсэн байв. 

Дунд зулзага ч бөөн баяр. Хэ хэ. 

Үдээс өмнө ажлаасаа чөлөө авч, багыгаа албанд нь өгчихөөд, хань ижлээ эмнэлэгт хүргэж өгч тариаг нь хийлгээд. Гэсэн ч нуруу нь өвчин намдаагүй л байна. 

Босч чадахгүй, босохоор л татаад. Таяг байдаггүй, гольфийн төмөр цохиурыг буруу харуулж бариад, таяг болгоод, булчин нь татсан нэг хүн байна манайд. 

За таминь минь нуруугаа хайрлаж байгаарай, биеэ энхрийлж байгаарай. Тэгэхгүй бол ч 00 орж чадахгүй, хүний гарт орох нь амархан байдаг юм байна шүү...

Өнөөдөр баасан гараг. Би нь долоо хоногжингоо нэг өвчтөн асраад, цоглог нь дэндсэн, ид хөдөлгөөнтэй байгаа бага зулзагаа нааш нь цааш нь болгоод, тоглож наадаад, номыг нь уншиж өгөөд, яриасаг, үе үе ааш нь хөдөлж ярвайдаг дунд зулзагаа бас нэг загнаж, нэг үглэж, нэг аргалж, нэг аядаж...

За сургуулиас бас л мэссэж ирээстэй. Үргэлжлүүлээд амарч байна. Ямартай ч бүтэн сайныг дуустал амарна. 

3 дахь, 4 дэх өдрийн хичээлийн агуулгыг сурах бичгийн тэд тэддүгээр хуудас гэж заавар ирсэн. Мөн 4 дэхийн орой нь сургуулиас нь очиж таблэт буюу жижиг оврын нөөтбүүк очиж авсан. 

Хөөрхий муу ээж л (би) гүйсэн. Сурагчид мэдээж өөрсдөө очиж авахгүй, учир нь юмыг яаж мэдэхэв гээд амарч байгаа улс. Яагаад гүйсэн гэхээр машинтай очиж болдоггүй, иймэрхүү нийтийн арга хэмжээнд. 

Ойр хавийн замын хөдөлгөөнд ачаалал үүсээд, элдэв замын хөдөлгөөний осол гарахаас сэргийлж тэр. Харьяа сургуульд л өгдгийн нэг гол, том зорилго, ач холбогдол нь юм даа.

Өнөөдөр буюу 5 дахийн өглөөнөөс түүгээрээ хичээлээ хийж байна. Дунд зулзага бөөн л баяр, инээмсэглэл тодруулаад л, нэг их дуудуулалгүй босч, үс гэзгээ самнаад, цайгаа уугаад, өрөөндөө орсон. 

Үе үе гарч ирж аавдаа нэг үзэгдэж байгаа сурагтай. 

Дээр хэн нь мэдэгдэгүй хүн эерэг гараад гэж бичсэн дээ. Энэ нь болохоор мэдээж цэцэрлэг сургуулийн удирдлагууд хэн хэн эерэг гарсныг бол мэдэж байгаа. Түүнийгээ нийтэд мэдээлэхдээ нэр ус зэргийг нь хэлэхгүй гэсэн үг. 

Учир нь тухайн өвдсөн хүний эрхийг хамгаалах үүднээс ил зарлалгүй, нууцалж буй бөлгөө. 

Сургуулиас ирэх мэссэж бүрт, энэ тухай анхааруулсан, хүүхэддээ ч мөн зөвөөр ойлгуулах тухай сануулсан үг өгүүлбэр байна.  

Дунд зулазага ч мөн ойрын хавьтал бус, шинжилгээ өгөх шаардлагагүй байсан, азаар. 

Хэрэв хоёр зулзага хоёулаа шинжилгээ өгөхөөр болсон бол гэж бодсон чинь...

За энэ амралтаар хань ижлийн нуруу илааршаад, жаахан уужуухан амьсгалах болтугай.

Ядаж байхад яр гэгчээр, хань ижлийн уруул болон хамар дээр яр гарчихсан. Миний уруул дээр ч мөн адил хомхой долоосон. Минийх ч бараг эдгэсэн л дээ. 

Энэ долоо хоногт явах ёстой байсан дугуйлангууд бүгд хойшилсан. Төгөлдөр хуур, зураг. Сагс угаасаа он гарснаас хойш бараг хичээллээгүй. Нэг л их завтай хүн болчихоод, дунд зулзага. 

Ямар сайндаа хүчээр англи үг цээжлүүлж байхав. 

За ихээ урт бичлэг болчихлоо. СБА шүү. 

Бүгдэд нь амжилт. Эрүүлийг эрхэмлээрэй. Түр баяртай.

Монголоос шуудан

Монголоос шуудан ирсэн. Гурван ном, хоёр цай, таван гоньд захив. Эмээ нь дур мэдэж чёко хийсэн байв. 

Би дуугай байхгүй, чёко иддэггүй бага зулзагыг минь чёконы амттанд оруулав гэж загнав. Ганцыг л хийнэ биз, юун олныг хийдэг юм гэж илүү үглэв. 

Эмээ нь хөөрхий минь "Юу өгөхөө мэдэхгүй юм, ааруул орж гарахгүй, ачааг нь хураачихаж магаж гэж айгаад" л гэсэн. Аргагүй аргагүй. Дараагийн удаа ганцыг л хийнэ шүү гэв. 

Гоньд ч яахав, хааяахан хийдэг бууз хуушууранд аятайхан байдаг. Хань ижил дуртай. Аан тийм найруулж уудаг сүүтэй цайнд бас хань ижил дуртай. О.зулзага бас хаа нэгтээ уудаг тул нэг уутыг нь өгсөн юм байна. Би энд сүүтэй цай чанах гэхээр нэг л цэхийгээд байдаг. 

Яагаад шуудан захих болсон бэ? гэхээр. Анхны цалингаараа, цалингийнхаа дээжээр ном захиад аа. Тэгээд тэрийгээ нааш нь бушуу түргэн гартаа оруулмаар санагдаад, нойр хүрэхгүй. 

Гартаа оруулсан чинь санаа амраад, уншина даа гээд номын тавиур дээрээ чимэг болгон өрөв. Мэдээж харж хэсэг баясана. Үнэрлэнэ. Үнгэнэ. Ганц нэг хуудас эргүүлнэ. 

Үүнийг өнгөрдөг 12 сард бичээд үлдээж. Оруулах  гэсээр байтал шинэ он гараад талийж. 

Ямар ном захиж гартаа оруулснаа тэгж байгаад бичимз, уншаад эхлэхээрээ. Зураг хөрөг оруулах гэхээр гэрэл цохичих гээд. Өөрөө ч уншиж амжаагүй байхад хүн гуйх гээд. 

Нээх номоо зээлдүүлдэг ч юм шиг. Ха ха. Ойрхон байдаг ахлах ангийн охид, хөвгүүд зээлж уншдаг л даа, ойрхон болохоор өгдөг. Түүнээс хол хүмүүст өгч завддаггүй. 

Уучлана биз дээ? Надаас ном асуугаад, зээлж авч чадаагүй улс минь. Харин өөрөө хүнээс ном голруулахдаа гавшгай нэгэн шүү. Ха ха. 

Нэг ч их олон ном голруулаагүй ээ хөөрхий. Санаа байвч сачий нь хүрэхгүй үе бий. 

Монголоос тэгж байгаад дахин шуудан авмаар байгаа ч би ээж аавдаа шуудангийн өртэй байгаа тул, өрөө барагдуулсныхаа дараагаар л санаархана даа. Ккк. 

Шуудангийн зардал чинь доторхоосоо илүү үнэтэй болчихдог золиг тул хэсэгтээ түрийвчнийхээ оосрыг чанга атгахгүй бол болохгүй.

Хурдхан шиг ко гуай дуусч, наашаа цаашаа хүмүүс ирж очин, би ширэн нүүрлээд л номоо дайж, захих юмсан. Тэр цаг хурдан ирээсэй. 

Түр баяртай, бүгдэд нь амжилт хүсье. 

Бага зулзага

Бага зулзагынхаа тухай бага бичээд байна уу? Үгүй юу? Тийм ээ? 

Ерөнхийдөө дээрх хоёртойгоо ижил л хүмүүжүүлж, өсгөж байна дөө. Хүйс нь ондоо гээд нэг их ондоороод, онцгойрсон зүйл одоогоор алга. 

Живхнээс гараад удаж байна. Тэгсэн үеийн хүүхдүүд одоо болтол гараагүй хүүхэд байх. 

Хэл ам гэж гүйцэгдэхгүй болсон. Одоо бол бид нартай ана мана хэрэлдэж байна. Хэлэхгүй үг гэж алга. Санаагаа бүрэн дүүрэн илэрхийлж байна. Бяцхан заль маль гаргаж байна. Толгой нь сүрхий ажиллаад байна, заримдаа ч. 

Мээмээ бариастай хэвээрээ. Хэдий болтол мээмээ, мөөмөө гэж барихыг би таашгүй. Нүүрээ нааж мансуурч энэ тэр. Дунд зулзага бүр 7 хүртлээ л шөнө унтахдаа мээмээ гээд имэрдэг байсан туршлагаас харахад даруй 5 жил дутуу байна. 

Ай хөөрхий миний муу шалчгар мөөм. Цагтаа сэрийсэн л байсан, худалч хүнд бараг оюутан болтлоо мээмчиг зүүдэггүй жижиг сэргэр л мөөм байсан даг. Ха ха. Одоо тэгсэн яасан? Жижиг шалчгар мөөм болж байна дөө гэж? 

Ай хорвоо чи бүсгүй хүний мөөмөөр "тоглож" ханах болоогүй юу? Эмэгтэй хүниий мөөм нээрээ үнэн увьдастай тийм ээ? Чойномын "Нүцгэн биеийг алдаршуулюу" гэдэг шиг "Бүсгүй хүний, эх хүний мөөмийг алдаршуулюу".

За багынхаа тухай бичиж байснаа бас л хадуурч байна. 

Юм болгон дээр ээж ээж гэдэг нь хэвээрээ, улам гаараад байх шиг санагдаад заримдаа уур хүрнэ хүрнэ. Би чинь хүн шүү дээ, дандаа сайхан загнахгүй. Аашлана, уурлана, загнана, үглэнэ. 

Тэгэх юмсан, ингэх юмсан гээд нэг дуулгачихвал мартахгүй эргэж сануулаад, шаналгадаг болсон. "Дэлгүүр хэсье" гэж хэлдэг ганц үгтэй. 

Албанаасаа харих замд нэг хүнсний дэлгүүр байдаг, тийшээ хааяа орж ганц нэг хүнсээ цуглуулдаг. Өөрийнх нь дуртай ганц нэг талх энэ тэрийг аваад өгчихсөн чинь амташсан хэрээ арван гурав гэгчээр байнга л орж байх санаатай. 

Дэлгүүр орно шүү, харихгүй шүү гэдэг болсон. Бүүр, даварчихсан байна уу? хэ хэ. Хэсэгтээ орохгүй болохоор бас дэлгүүр ормоор байна гэх нь багасч байна шүү. 

Би албаар орохгүй 7 хоносон чинь, хажуугаар нь өнгөрөхдөө олон долоон юм хэлэхгүй байна лээ. Тэгэхээр ээж бид чанга байх ёстой тийм үү? 

Ганц нэг буруу хэлээд байдаг байсан үгс нь засарч байна. Цэцэрлэг бас их олон юм заах юм өө. 

Номонд дуртай хэвээрээ. Нээрээ нэг өдөр албан дээрээ өдөр нь унтаагүй гээд гэртээ ирээд эрт унтаад өгсөн. Ээж оронд нь оруулсан чинь оройд уншдаг зурагт номоо унш гэж уурлаад, нойрмогоороо. 

Халтуурдаад уншилгүй, товчлоод яриад өгчих санаатай, санаж байгаагаараа ярьсан чинь тэгдэггүй шдээ гэж уурлаад, унтаж байгаа юм байж уйлаад. Юуг тэгдэггүй юм бэ? гэсэн чинь нэг үйл үгийг одоо цаг дээр хэлэх байсныг өнгөрсөн цөг дээр хэлчихэж гэнэ. Ёхххх. 

Нэг номыг уншуулахаараа бүр тэгж цээжилтлээ уншуулдаг. Тэгээд нэг ном олж ирээд тэрийгээ бас цээжилтлээ уншуулна. Би ч нэг номыг сар гаран уншиж өгнө шүү дээ. Мундаг уу? Хэ хэ. 

За тэгээд сэлмээр байлдаж тоглодог, сэлмээр цавчиж тоглодог, Харри Поттерийн шидэт саваагаар "экспээкто патронаам" гэж хэлдэг нэг хүн байна даа. 

Өө их урт бичлэг болчихлоо. Түр завсарлая. Түр баяртай. Бүгдэд нь амжилт хүсье. 

Хөршийн холбоо

Хөршийн холбоо мандтугай. Хажуугийн хажуугийн хажуугийн айлын хөрш минь шүү дээ. Байнга л гого амттан, хааяадаа хоол зөөдөг эмээ. Би л эндээ эмээ гээд байгаа шүү. Түүнээс хөнгөн шингэн ануухан. 

Ээжээс минь нэг их дүү бол биш гэж бодож байгаа. 

Энэ удаагийн амттан. Амтат төмсөөр хийсэн. Бид байхгүй байсан чинь хаалганы бариулаас өлгөчихсөн, дараа нь мэссэж бичиж хэлсэн. 

Бага зулзага бид хоёр л идээгүй. Бусад нь буюу хань ижил, дунд зулзага хоёр хэн нь хэдийг идэх үү? гээд л хэлэлцээд байсан. 

Би яагаад идээгүй вэ гэхээр амттанаа багасгаад, дэглэм барьж буй бөлгөө. 

Хөвсгөр гэж хэрээс хэтрээд байсан тул, зориглоод эхэлсэн. Дасгал хөдөлгөөн хийх гэхээр нэг л боломж бүрдэж өгөхгүй байна. Тийм болохоор ядаж байнга хэвж байдгаа болиод, зөв хооллолтоос эхлэхээр шийдсэн бөлгөө. 

Гэрийнхэн нээрээ ямар их хэвдэг юм бэ? Ямар их амттан авдаг байсан юм бэ? гэж өнөөдрийн өндөрлөгөөс харж сууна даа. Хэ хэ. 

Хамгаас дуртай хар шоколадаа хүртэн танаж байна. Цагийн сайханд амралтын өдөр сайхан хар боргол хийж аваад хажууд нь зоолттой нэг хар чоко иддэг байлаа шүү дээ. 

За за энэ дэглэмийн тухай тусад бичихийг хичээнэ ээ, бодно оо. Өнөөдрийн бичлэг хөршийн холбоо шүү дээ. Сэдвээ дагая. 

Хөршүүд минь ээ хөвсгөрөөсөө салмаар байгаа тул түр завсарлаачээ гэж хэлмээр байвч гэрийн бусад гишүүд миний өмнөөс хэлмэгдчих гээд байгаа юм шиг санагдаад хэлээ хазаад л өнгөрлөө. Хи хи. 

Дараагийн хөршийн холбоогоор ямар зураг оруулах нь таашгүй. 

Түр баяртай, бүгдэд нь амжилт хүсье.

Больсон

Дунд зулзага нэг дугуйлангаа болив. Арай л олон юманд яваад байх шиг санагддаг л байсан. Гэхдээ төрөл нь бол цөөн, дөрөв. 

Яагаав өнөөх сагс нь долоо хоногт дөрвөн удаа, тэгээд үлдсэн гурвынх нь нэг нь сардаа хоёр удаа гэхээр бараг өдөр бүр нэг дугуйланд яваад, ядраад байхаар нь нэгнээс нь гаргахаар шийдээд. 

Гол нь өөрөө дургүй байлаа. Томроод ирэхээрээ ичих булчирхай нь ажиллаад эхэлдэг юм байна. 

Сарын эцсээр шалгалт авч, шатыг нь ахиулдаг юм. Тэгсэн зулзага яахав, угийн нэг их биеийн тамирын хүн биш тул, ядаргаатай, би удаан, тэгэхээр түрүүлээд байндаа хүрчихсэн хүүхдүүд бүгд намайг хараад, ичмээр байдаг. 

Гэх мэтээр явахынхаа өмнө үглээд, унжийгаад байдаг байсан юм. Эхэндээ бол дуртай л байсан. Томроод, дээрээс нь олон юманд яваад байгаадаа түүртээд дургүй болж эхэлсэн. 

Уг нь нэг мөсөн анги дэвшихэд нь буюу 4 сараас болиулна гэж бодож байсан чинь наана нь хүндэтгэх шалтгаантайгаар болив. Хэ хэ. 

Тэр хүндэтгэх шалтгаан гэдэг нь сагсныхаа дугуйлангийнхаа ахлагчаар томилогдчихсон. Баяр хүргэе. Хэ хэ. 

Угтаа бол баярламаар зүйл ч, энд бол үнэн ядаргаатай юм билээ. Хариуцлага гээч зүйл дагадаг. Ганц хүүхдэдээ ч биш, ээж аавд нь бас давхар ачаалал өгдөг юм байна. 

Сургуулилтын үед байнга очиж харах, элдэв асуудал гарвал зохицуулах, ачаа энээ тэрээг нь зөөх. Багаасаа ингэж сүргийн? бүлгийн ажилд оролцож сураагүй бидэнд ачаалалтай л байна. 

Ядаж байхад бас лайн гээж өөрсдийнхөө холбоогоор байнга мэссэж бичилцэнэ. 

Яасан ч завтай ээжүүд байдаг юм гэж би гайхаж байна. Орой болтол хүйтэн зааланд хөлдөж үхэх гээд хүлээнэ. Оройн хоол энэ тэрээ яадаг юм болоо гэж бодно, би. 

Эх орондоо юм болохоор эрх биш эмээ өвөө, ах дүү нар нь ойр байдаг хүмүүс ч гэсэн өөр газраас ирсэн хүмүүс ч их л байдаг. Яаж амжуулаад зохицуулдаг байна аа, гайхаад, бишрээд барахгүй л сууна. 

Тэгээд ядаж нэг хүргэж өгч авдаг ажлаа эртхэн шиг хасахаар шийдээд. Мөн дунд зулзагаа бодоод ийм шийдвэрт хүрлээ гэж.  

Бага зулзагаа иймэрхүү спортын дугуйланд ороход нь бас сайн бодолцмоор санагдлаа. Эдний дунд ороод, хүү хаа гэж чадна гэж бодсон хойноо л оруулмаар санагдав. 

Түүнээс хүргэж өгөөд л авчихдаг, жилдээ нэг тайлангаа хийчдэг дугуйлангууд нь их амар юм аа. 

Зулзага минь сагсандаа тийм ч сайн биш, төгсөх ангийн хоёрхон хүүхэд явдагийн аль нэг нь болох ёстой. Тэгсэн сагсандаа сайн биш ч гэсэн өөр үзүүлэлтээрээ өнөөхөөсөө давуу байсан бололтой. 

Дасгалжуулагч, мөн төгсөөд явсан сэмпай нар нь санал нэгтэйгээр сонгочихсон. Өнөөх нэг охин нь уг нь сагсандаа их сүрхий байхгүй юу, ааш зан нь жаахан эрх талдаа охин байдаг юм. 

Би бол тэр охиныг л болчоосой гэж бодсон. Ер нь ачаалал ихдэхийг мэдээд байсан л даа. Гэхдээ яг ингээд явахаар ажиллагаа ихтэй юм аа. Ганц хүүхэдтэй бол бас болж байна өө, хама, амь амьдралаа түүндээ зориулна. 

Бага зулзага ид ааштай араншинтай, юм болгон дээр ээж ээж гэдэг дээрээ явж буй тул, нэг л учраа олохгүй бухимдал төрөөд, лайн гээч зүйл дээр нь би юм бичихээ байсан. 

Хань ижлийг чи өөрөө дагуулж явж оруулсан, өөрөө хариуц гээд. Өнөөх чинь ажил ихтэй, оройтож тардаг болохоор бас л хэцүү байх шиг байна өө. Хурдхан шиг нэг жил өнгөрөөсэй. 

Аан гэхдээ коронагийн ачаар элдэв уралдаан тэмцээн хойшлогдоод, цуцлагдаад ашгүй л байна. Энд он гарснаас хойш огцом нэмэгдээд, бэлтгэл хүртэл амарч байна. 

Хэд хэдэн бага сургуульд халдвар гараад, хотынхон маань сандарч л байна. 

Гур зуур ийм сонинтой. Бага зулзагынхаа тухай бичих юм байна шүү. Бүр матрчихаж бичих ээ. Хэ хэ. 

За маамаа нартай ээж аавуудад амжил хүсье ээ. Түр баяртай.

Эрвээхэй цахирмаа

Хотод минь байдаг ганц том моолын нэг буланд жижиг амьтдын дэлгүүр нээгджээ. Ойрд ороогүй байсан болохоор эртээд ороод, бөөнөөрөө тэнд бараг бүтэн өдөр болсон. 

Бага зулзага баярлаж байна гэж. Нохой, тоть, яст мэлхий, загас, туулай, зараа, муур гээд л байна шүү. 

Хань ижил гэртээ жижигхээн хөөрхөн аквариумтай болдог юм билүү? Хүүтэйгээ хамт загас тэжээдэг юм билүү? гэсэн. 

Зулзагууд нохой тэжээмээр байна л гэдэг юм. Хэд хоног сонирхоод арчлах л байх. Яваандаа миний ажил болно гэж бодоод, том болоод тусдаа гарахаараа тэжээгээрэй л гэдэг юм. 

Нээгдээд удаагүй болохоор ийм цэцэг энд тэнд харагдсан. Шинээр ямар нэгэн дэлгүүр хоршоо, хоолны газар гээд л нээхэд нээлтийг нь мялааж ийм цэцэг бэлэглэж, үүдэнд чимж байрлуулдаг юм. 

Нэр нь японоор 胡蝶蘭, англиар phalaenopsis orchid, монголоор эрвээхэй цахирмаа. Яг эрвээхэй цахирмаа гэж хэлдэгт яг таг 100 хувь итгэлгүй байгаа ч ямартай эндээ биччихлээ. 

Энэ цэцэгнүүдийн нэрсийг хайж олсноо мартчих гээд байдаг талтай. Мартахгүйн тулд, санаж байхаар эндээ үе үе ингэж бичдэг шүү. Ойлгоод, хөнгөн талаас нь уншаад өнгөрөөрэй. 

Гэснээс энэ цэцэгний зураг хөргийг хуучин болон шинэ блогтоо оруулж байсан шиг санаад байна. Дахин бичиж, үнэт цагаас нь хугасласан бол уучлаарай. Хэ хэ. 

Соёлтой гэгч нь хүн байна гэхгүй юу. 

Түр баяртай. Гэснээс цагаан ногоон сар боллоо доо. Бууз баншаа бэлдсэн үү? Бүгдэд нь амжилт хүсье. 

Сүши

За муу хүн идсэн ууснаа. Сонирхолгүй бол алгасаарай. Одоо ч тэгээд ийш тийшээ орж гарахгүй болохоор чинь идсэн ууснаас өөр сонин хачингүй болчихлоо. Ойлгоод хөнгөн уншаад гараарай. Хэ хэ. 

Яагаад сүши идэх болсон гэхээр? Төрсөн өдөр болоод өнгөрсөн гэсэн дээ. Ажлын өдөр ч таарав. Ажилдаа яваад ядарсан улсууд, юун гэртээ цуйван энэ тэр сэгсрэх. 

Гадуур хооллох болоод. Гэртээ ихэвчлэн мах иддэг махчин улсууд, загас идэхээр болоод. Загас ч гэсэн мах л даа уг нь. Хи хи. Ойрд ороогүй, шүси идэцгээе гээд ээ.

Би нэг иймэрхүү түүхий сонгино сармисанд дуртай. Муухай үнэртэй л гээд байдаг юм, сармисыг. Гэхдээ л эрүүл мэндэд сайн биз дээ? Хуурч буй сармис, сонгины үнэр ч үнэн тансаг тийм ээ? 

Далайн хясаа. Жижиг нь. Хясаан доторх зөөлөн биетийг нь иднэ. Дуртай гэж юүхэв. Нэлээд үнэтэй. Тэр бүр бас авч идэхгүй ээ. Мисо шөлөнд их хийж иддэг юм билээ, япончууд. 

Шиманэ мужийн Шинжи гэдэг нуураас олборлодог хясаа энэ хавьдаа нэлээд алдартай. Уулынхан минь их иддэг.  

Шүсиний газрууд дан түүхий загас гэхгүй. Хүүхдүүдэд зориулсан иймэрхүү хоолнууд бас байдаг. Одоогоор түүхий загас идэж чадахгүй бага зулзага захиалж идсэн. 

Шарсан төмс, тахианы мах. Хажуугаар нь сүшинийхээ будаанаас өгчихнө. 

Наймаалжны ороомог? Энэ бөөрөнхий гурилан дотор жижигхэн хэрчсэн наймаалж бий. Олон бөөрөнхий хэвтэй тусгай шарагчинд шардаг. Баярын үеэр энд тэнд их худалдаалагдана. 

Манайхны наадмын хуушуур шиг. Ихэвчлэн л авч идэж харагддаг. Бид бас зоолттой иднэ. Халуунаар нь үлээж ирээд л иднэ шүү дээ. Сакүрадах үеэрээ гэх мэт. 

За муу хүн нь идсэн ууснаа сайхан дэлгэрүүлээд өнгөтөөр биччихлээ шүү. Төрсөн өдрийн паарий нэг иймэрхүү даруухан болж өнгөрлөө. Мэдээж харьж ирээд бялуугаа идсэн. 

Бид үргэлж олон төрлийн жижиг бялуунууд авдаг юм. Энэ удаад гүзээлзгэний ганц том бөөрөнхий бялуу авсан чинь зулзагууд нэг их идээгүй. Дээрх крем энэ тэр нь хэт их байна, нялуун байна гээд. 

Дараа дараагийн төрсөн өдрөөр улалмжлал ёсоороо олон төрлийн, дуртай гэснийгээ л сонгож авахаар болов. 

Гэснээс тосны гэх мэт зүйлсийн үнэ нэмэгдээд бялууны үнэ ч нэмэгдэж буй гэж сонины мэдээнээс уншсан. Өмнө нь авч байснаас үнэтэй ч юм шиг санагдаад, санаа дагасан ч байж магад. 

Яваандаа элдэв амттанаас гарах л хэрэг болж байх шиг. 

Бүгдэд нь амжилт хүсье. Түр баяртай. 

Амттан

Амттанаа идсээр л, хивсээр л. Энэ гэхдээ өнгөрдөг долоо хоногийх. Энэ долоо хоногоос энэ байнга хивж байдгаа больсон. Яг долоо хоног дээрээ явж байна. Сар гарангийн дэглэм барьж буй билээ.

Шинэ хүн ажилд ороод. Нэг хүүхэн өнгөрдөг 8 сард ажлаасаа гарсан юм. Уг нь залуухан, миний үеийн. Эрүүл мэндийн шалтгаанаас. Гэхдээ шинэ дарга цэрэгтэй таараагүйгээс болсон сураг байсан.

Шинэ хүн 1 сараас ажилдаа орж, ийм амттан барьж ирсэн. Би нэгийг нь амссан. Бусдыг нь гэртээ авчраад гэрийнхэндээ өгчихсөн. Юу ч идсэн хөвсийдөггүй хүмүүс гэрээр нэг байх юм. 

Өвс идэж ус уугаад байгаа хэрнээ л хөвсийгөөд байдаг нэг хүн байх юм. Яалтай?

О.зулзага харьж ирэхдээ ажлынханд минь авч ирсэн амттан. Гүзээлзгэнэтэй, чокотой. Би амсаагүй. Амттан ихсээд гэж цаанаасаа бие организм хэлээд байхаар нь. Хэ хэ.

Төрсөн өдөр болоод өө, саяхан. Тэгсэн ажлынхан ийм зайрмагаар дайлаад. Энэ зайрмаг чинь их үнэтэй, тэр бүр авч идэхгүй. Хааяа л цалин бууж тансаглахаараа авдаг юм.

Амттанаа танаж буй надад амжилт хүсээрэй. Бас битгий уруу татаад байгаарай. Хи хи.

Түр баяртай. Бүгдэд нь амжилт хүсье.

Амьд үгс

Энэ жилийн анхны япон ном. Зохиолч нь Сэтоүчи Жякүчёо. 99 насандаа өнгөрдөг жил таалал төгссөн. Гэлэнмаа, зохиолч хүн. 

Олон жилийн өмнө Киото хотод болсон нэг яриаг нь сонсож байсан юм. Тухайн үед хэл ус минь маруухан, нэг их зүйл ойлгоогүй ч, нэгэн ах дүү 2-ын тухай ярьж байсныг л бүүр түүрхэн санаж байна.

 Японд байдаг хүмүүс бол ихэнх нь мэдэх байх өө. Сонирхвол нетээс хайгаад үзээрэй, гараад л ирнэ. Зоолттой. 

Таалал төгссөнийх нь дараа гэнэт ухаан орж номнуудаас нь уншиж үзэхээр шийдээд. Худалдаж авах гэснээ болиод зээлж уншихаар шийдэв. 

Намтар түүх нь бас л сонирхолтой юм билээ. Токүшима мужид төрж өссөн. Гэрлээд нэг охинтой. Нөхрийнхөө шавьтай нь учир ургуулж дурлалцаад, гэрээсээ яваад гэх мэт.

Мэдээж олон зохиол бичсэн, олон ч шагнал хүртсэн. Романуудаас нь тэгж байгаад уншина гэж бодож байгаа. Шалиг сэдэвт зохиол бичээд хэсэгтээ "умай зохиолч" гэдэг хоч нэр зүүж байсан гэнэ. 

Энэ гэхдээ анх зохиол бичин гарч ирж байх үеийнх нь л хоч бололтой юм билээ. Нас ахиад гэлэнмаа болоод, мэдэхгүй хүн ч гэж үгүй, нэр хүндтэй л буурал байсан. 

Тэр шалиг зохиолууд нь анхаарал татаад. Юу бичихээрээ ийм хоч авчихав гэж бас бодоод. Хи хи. 

Энэ удаагийн ном бол "Чамд зориулах амьд үгс" гэчих үү? Өөрийн ойлгосноороо л орчууллаа. 

Номын агуулга гэвэл, хүмүүст урам өгөх, буддын ганц нэг сургааль үгсийн тайлбар, хүн гээч амьтны мөн чанар, туйлын хүсэл, алдаа оноо, сул тал, эр эм хүмүүсийн онцлог гэх мэт бичжээ. 

Зарим нэг үг хэллэг шашных болоод ч тэр үү? хэцүү санагдсан. Орчуулж бичих гэхээр бас ур чадвар хүрэлцэхгүй тул ингэсгээд л төгсөв. Хэ хэ. 

Орчуулахгүй ч гэсэн таалагдсан хэдэн мөртийг энд япон хэлээр нь хуулж бичлээ. 

私は元気なのは、お喋りだからと思います。

思う存分喋れば、お腹にも心にも何も貯まりません。

何でも貯めると、ろくなことはありません。

ストレス解消は、気の許せる人と心ゆくまで喋ることです。

ただし、本当に偉い人とは喋らずに聴くのです。

Ямартай ч санаж байх зорилгоор блогтоо оруулав. 

Түр баяртай. Бүгдэд нь амжилт хүсье. 

Элдэв

Зураг хөрөггүй бичлэг оруулах гэхээр нэг л эвгүй байдаг болжээ. Хэ хэ. Заавал л хачир болгож зураг оруулах гэдэг болж. 

Энэ өнгөрдөг жилийн нэгэн налгар өдөр манай хоёр шүхэрнүүдээ ингэж дэлгээд, майхан болгож тоглосон. Бид бас багадаа ингэж тоглодог байсан. Эвхдэг орыг дэлгээд, хажуу тал руу нь харуулж байгаад дээрээс нь гутас энэ тэрээр бүтээгээд майхан болгодог байсан. Хэ хэ. 

Нэгэн эмээгийн гэрт байсан ваартай цэцэг. Гоёмсог санагдаад зураг дарсан байх. Ухаалаг утсанд минь явж байна. Эндээ оруулаад, утсан дээрхээ устгачихлаа. 

Хүнсний дэлгүүрийн үүдэнд ганц нэгээр нь боосон цэцэг навч их зардаг. Эмээ нар их авч харагддаг. Бодвол гэртээ ингэж ширээгээ чимдэг байх. Мөн бурхан тахилынхаа өмнө их цэцэг тавьдаг юм билээ. 

Манайхны зул шиг ч юм уу? Гал их гардаг тул зул, болон лааг барагтай л бол асаахгүй байх шиг харагддаг. Гэртээ хааяа лаа асаахаар хань ижил гэрт гал тавьчихна гээд нэлээд болгоомжилно шүү дээ. 

Гэрээ халааж байна гэж, киросен гэх мэтээр ажилладаг халаагч ашигладаг айлууд их гал алддаг юм шиг байна лээ. Болгоомж хаана ч илүүдэхгүй тийм үү, хань ижлийн түмэн зөв. 

Урдаа барьдаг нэгэн том моолын үүдэн дэх ариутгагч. Сагсыг ариутгаж буй байдал. Нэг хэсэг ороогүй байж байгаад очсон чинь үүдэндээ ийм юмтай болсон байхаар нь соёлтой танилцаж, соёлын шоконд орохоо шахаж билээ. Хи хи.

Нэг иймэрхүү л элдэв зурагтай бичлэг боллоо. Бичих гэсэн бас яаж дэлгэрүүлж бичихээ мэдэхгүй байгаа тул ингээд өндөрлөх үү дээ. 

Түр баяртай. Бүгдэд нь амжилт хүсье. 

Хөршийн холбоо

Хөршийн холбоо минь бат бөх, өгч авалцсан хэвээрээ л байна. Нэг бодлын сайхан, нэг бодлын санаа зовмоор ч юм шиг. Гэхдээ яахав, амьдрал бэлгийн замаар өрнөөд ирэхээрээ сайхан гэж нэг мундаг хүн хэлдэг, бичдэг юм. 

Хатаасан илжгэн чих. Дуртай гэж юүхэв. Энэ гэхдээ ойрын хөрш биш, хань ижлийн найз өгч явуулсан байсан. Би л ганцаараа идсэн. Бусад минь нэг их идэхгүй л байсан. Азны коля билүү? Бүгдийг шахуу идсэн. 

Улирал нь дууссан ч хатаасан нь дэлгүүрт мэр сэр харагддаг. Үнэтэй гэж юүхэв. Худалдаж авч идэхгүй ээ, хэмнэх гээд. Сүүлийн үед чёко гэх мэт дуртай зүйлсийнхээ хажуугаар нүдээ аниад гардаг болсон. 

За энэ сонин бөгөөд хачин ногоог бас л хань ижлийн найз өгч явуулсан байсан. Нэрийг нь мартчихсан, юу гэлээ дээ? Нэг тийм романчик нэртэй гэсээр л орж ирсэн юм. 

Нэлээд дээхний явдал. Нүүр номдоо зураг хөргийг нь оруулсан чинь дорхноо л мундагууд нэр усыг нь хэлж өгсөн. Франц гаралтай ногоо гэсэн. Нэр ус нь broccolo romanesco гэдэг гэсэн. 

Өмнө нь хальт хамт ажиллаж байсан франц хүүхэн бас сэтгэгдэл бичиж үлдээсэн байсан. Романэско байцаа гэдэг гэж хэлж өгсөн. 

Мартахаасаа өмнө эндээ бас орууллаа. Та нарт бас хэрэг болж юуны магад. 

Түр баяртай. Бүгдэд нь амжилт хүсье. 

Бөмбөрийн дугуйлан

Монголтой хамтарч явуулсан нэгэн арга хэмжээний нэгээхэн хэсэг. Нэгэн бага сургууль дээр явагддаг бөмбөрийн дугуйлангийн тухай танилцуулга болсон юм. 

Тэр үеэр дарсан зураг. Ойроос сонсохоор аятайхан. Дан бөмбөрийнх болохоор нэг тийм дүнгэнэсэн ая тоглосон. Түүнээс өөр хөгжим энэ тэртэй хамтарч тоглохоор сүртэй юм билээ. 

Эрэгтэй хүүхэд сурахад гоё ч юм шиг санагдаад, бага зулзагаа оруулчихмаар ч юм шиг санагдаад. Ингэхэд бага зулзага минь бидний амаар бол бүх л дугуйланд явчихсан байгаа шүү. Ккк. 

Хүн болгон л нэг аманд орсныгоо хэлж байна. Яг юунд яваад эхэлснийг цаг тухайн үед нь эндээ бичээд явах байх даа тийм ээ? 

Цахим арга хэмжээ байсан тул цаанаа буюу монгол хүүхдүүдэд хэр сонсогдсоныг сайн хэлж мэдэхгүй л байна. 

Ямартай ч японы хөдөөний нэгэн бага сургуульд бөмбөр гээч зүйлийг идэвхитэй суралцдаг хэсэн хүүхдүүд, томчууд байдаг гэж мэдэж авсан байх гэж найднам. 

Түр баяртай, бүгдэд нь амжилт хүсье. 

Дуу хөгжмийн анги 3

Үргэлжлэл шүү. Сонирхолгүй бол алгасаарай. 

Triangle хөгжим. Нэр усыг нь яг таг хэлж мэдэхгүй юм. Гурвалжин зэмсэг? Хо хо. Энэ хөгжимтэй холбоотой нэг сонирхолтой яриа байдаг, манайд. 

О.зулзага дунд сургуульд ороод үлээвэр хөгжмийн дугуйланд орно гэхэд хань ижил "тэр гурвалжин төмрийг дардаг хүн нь болвол яах юм? яахын бэ орж" гэж билээ. 

Нээлтийн арга хэмжээнд үлээвэр хөгжмийн сурагчид ая тоглож өгдөг юм. Тэгсэн энэ хөгжмийг нэг сурагч дарж харагдаж л дээ. Хэ хэ. 

О.зулзага тэгсэн дараа нь "triangle хөгжимнөөс уучлал гуй, салгаж болшгүй хөгжмийн зэмсгийн нэг" гэж аавыгаа загнаж байсан юм. Ккк. 

Том хавтгай нь манай цамыг бүжигт гардаг шиг байгаа нь бас л нэрлэж мэдэхгүй юм. Ер нь мэддэг юмаар хомс шүү. Ойлгоорой. 

Үүний нэрийг бас л мэддэггүй ээ. Ямар СУИС-ын оюутан ч биш, мэдэх албагүй биз дээ. Ха ха. 

Ядаж японоор нь мэдэж байвал тийм ээ. Санахаараа охидоосоо асууя байз. Тэд бол дор нь хэлээд өгнө. 

Цэцэрлэгт байхаасаа л харж, сонсож, тоглож өссөн улсууд чинь аргагүй биз дээ. 

Тэр жижиг улаан цэнхэр нь хайсан чинь кастаньет гэж гарч ирж байна. Яг юу гэж монголоор хэлдгийг мэддэг хүн хэл өгөөрэй. Хичээнгүйлэн хүьсе ээ. 

Манайд бий. Үе үе зулзагууд дараад байдаг. Урлагийн үзлэг энэ тэрд бол их л чухал үүрэгтэй шүү дээ. Бие жижиг ч бэлчээр томтой гэдэг шиг. Аягүй сонин зүйрлэл болчихов уу? яав? Ккк

За ингээд энэ сэдэв өндөрлөв. Угаасаа дарсан зураг ч дуусав. 

Түр баяртай. Бүгдэд нь амжилт хүсье. 

Дуу хөгжмийн анги 2

Харанхуй өрөөн дэх хөгжмийн зэмсэгүүдийн зураг шүү.  Сонирхолгүй бол алгасаарай. 

Гэснээс яагаад харанхуй өрөөний зураг дарах болсон бэ гэхээр? Ганган улаан дээлээ өмсөх гэж орохдоо л амжуулсан нь энэ. 

Бөмбөр бас л сүртэй шүү дээ. Яг хажууд нь зогсоод сонсоход. Эрэгтэй хүүхдүүд бол их күүл харагддаг. Хэ хэ. За тэр ксилофон хөгжим бас их гоёмсог аялгуутай санагддаг. 

Энд бүр цэцэрлэгт хүртэл байдаг. Том ангийн хүүхдүүд их эвлэгхэн дарж харагддаг.

Энэ баян хуур хөгжим шууданд нүдэнд өртсөн. Багадаа их л харж байсан юм болохоор тэр байх даа, хөөрхий минь. Тарчигхан ч гэсэн тансагхан бага нас минь. Ооё, хи хи. 

Metallophone хөгжмийн зэмсэг. Энд бүр жаахнаасаа тансаг тансаг хөгжмийн зэмсэгтэй нөхөрлөөд, найзлаад явдаг нь ихээхэн атаархал төрүүлнэ ээ. Хүн юм чинь, дээрээс нь эмэгтэй хүн юм чинь атаархана шүү дээ. Хи хи. 

Энэ аль нэг цохиур хөгжмийнх нь цохиур бололтой. Дээр хэдэн жилийн өмнө маринба хөгжмийн тоглолт үзэж байхад иймэрхүү өнгө алагласан цохиур харагдаж байсан. Бодвол дээрх хоёр хөгжмийнх байх. 

За үүний нэрийг хэлж мэдэхгүй байна. Ядаж японоор нь мэддэг бол гүүгл орчуулга хийхгүй юу. Хэ хэ. Юм хөгжинө өө гэж. 

Хажууд нь харагдаж байгаа гонзгой модоор цохьдог байх. Мэддэг хүн байвал хэлж өгнө биз дээ? 

Нэг иймэрхүү. Үргэлжилж магад шүү, энэ бичлэг. 

Түр баяртай. Бүгдэд нь амжилт хүсье. 

Дуу хөгжмийн анги

Нэгэнт эдний бага сургууль орж эх орноо танилцуулж, ганц хоёр цаг багшийн ажил хийдэг тухай бичсэнийх, дуу хөгжмийн ангийх нь тухай зураг оруулах санаатай. 

Баахан л зураг дарсныг бодвол эндээ л бичих гэж тэр байх. 

Нэгэн бага сургуульд цөөн хүүхэдтэй ангид хичээл орсон болохоор дуу хөгжмийн ангийг эзлэнхэн хичээл заасан. 

Тухайн сургуулиасаа хамаараад болох анги танхим, сурагчдын тоо гэх мэт нь ялгаатай байдаг юм. 

Дуу хөгжмийн анги гэсэндээ ширээ нь хүртэл ийм. Будчихсан. Их хөөрхөн санаа санагдаад. Манайд бас ингэж анги танхимаа тохижуулдаг сургууль байгааг үгүйсгэхгүй шүү. Зөвөөр ойлгоорой. 

Ангийн ард ийм жижиг өрөөтэй. Дээхний байруудад байдаг шиг харанхуй өрөө гэх юм уу? Хэ хэ. 

Гэхдээ одоо бодох нь ээ, 3 өрөөтэй айлд харанхуй өрөө гэж байдаг байсан тэ. Өдий насанд хүрээд бодсон чинь 1 эсвэл 2 гэх мэт цөөн өрөөтэй айлд л харанхуй өрөө бэлдэж өгвөл элдэв новшоо хураана даа тийм ээ? 

Энэ оросууд гэж бас л маньтайгаа адил сэтгээд гэхгүй юу? Ккк. 

Ингээд хальдаг тийм ээ? би. 

Сүүлийн зургийг харахад бас л өвөрмөц өвөрмөц хөгжмийн зэмсэг харагдаж байна уу? 

Би багадаа ийм орчинд өссөн бол ч өдийд дуулаад, хуурдаад уярааж байгаа дөө. Даанч...

Адаглаад "солгой" гэж хэлүүлэхгүй л байх байсан гэж боддог. Хи хи. Солгой хоолой гэж байдаггүй юм гэсэн шүү. 

Залуухан ээжүүд, аавууд тогтоож аваарай. Нэг их дуучин болчихдоггүй юм аа гэхэд эвлэгхэн дуулдаг болгоорой, үр зулзагуудаа. Хэ хэ. 

Бас мэргэжлийн хөгжимчин болгодоггүй юм аа гэхэд нот мэддэг болгоорой. 

Гэж зөвлөх байна даа, атаман ээжийн хувиар аминчлан захихад. Өөр ч зүйлгүй дээ. 

Түр баяртай. Бүгдэд нь амжилт хүсье.

Шинэ оны мэнд ээ

Шинэ оноо сайхан угтацгаасан биз дээ? Энд тэнд л элдэв шинэ жил болоод, ганган ганган бүсгүйчүүд, залуучуудын зураг их харсан. Заримдаа ч атаархана өө, хүн л болсон хойно. Хи хи. 

Гэтэл манайд яасан? Ажлын газрынхан "чинжил"-дээгүй. Нэг хөвсгөр талх хувааж идээд л болсон. Бразилиас ирсэн гэсэн, хаа холоос. Манайхаар жимстэй кекс шиг юм билээ. 

За тэгээд хэдэн өдөр гал тогоондоо тогоо шанагаа эргэлдүүлсэн шиг л амарлаа. Юун ном унших? Юун өөртөө цаг гаргах? Бусдад л цаг гаргаж, бусдад л ном уншиж өгөх шив? 

31-нд уламжлал ёсоор 2 удаа шампанск буудуулав, 2 орныхоо цагаар. Ижий аав руугаа ярьж мэнд мэдэв. Зулзагуудын унтах цаг энэ тэр нэлээд форм алдагдсан. Дотроо бол өөрийгөө асар буруутгаастай мөртлөө үйлдэл нь эсрэгээрээ байхаар бас жаахан бухимдах талдаа юм аа. 

10 жилийн сурагчид ирж, бууз, төмсний хучмал идэцгээсэн. Салат хийгээгүй, бялуу аваагүй. Цаг зав жаахан хомс, цас хур ихтэй байсан тул захиалж амжсангүй. 

Монгол хүүхдүүд минь "бялуу яахав ээ эгч минь, бууз л тасархай байна" гэж урмаар тэтгэсэн. Сэтгэл сайхан амарсан. Түүнээс гэрээсээ хол хүүхдүүдэд ганц гоё баяраар нь бялуугүй гэж санаа зовоод байсан юм. 

За тэгээд шинэ ондоо амжилт бүтээлээр дүүрэн, олз омог ихтэй, сурлага хөдөлмөрийн өндөр амжилттай, гол нь эрүүл энх, өвчин зовлонгүй байхыг хүсэн ерөөе өө. 

Өөртөө ч гэсэн олон сайхан ном уншиж сэтгэлийн таашаалтай, блогоо ч таслалгүй бичээд, зулзагуудаа ч хайрлан өсгөөд, хань ижлээ халамжлаад, эрүүл саруул байхыг хүснэ. 

Ажил эхэлсэн, сонин сайхан, зураг хөргөө уламжлал ёсоороо жаахан хоцрос гээд тайлан болгоод оруулаад явна аа. 

Түр баяртай, бүгдэд нь амжилт хүсье.

Эх орон минь ээ

Жил бүр эх орноо танилцуулдаг ажил минь нээрээ амжилттай явагдаж дууссан шүү дээ. Би чинь энэ жил биш ээ өнгөдрөг жил их эрэлттэй, завгүй байсан шүү. 

Шагайныхаа тухай, дээлнийхээ тухай л их бичдэг дээ. Энэ удаад арай өөр зүйлийнхээ тухай бичих гээд. 

Зураг дээрхийг харж байна уу? Харандааны сав их хөөрхөн. Хамгийн гол нь бат бөх. Олон жилийг хамтдаа элээж, олон ч сурагчдын гарын аяыг дааж иржээ.  

Тэр хүүхэлдэйнүүд хөөрхөн. Гэм нь гаднах хуванцар сав нь их хэврэг. Наалт нь муу. Хэд хэдэн өөр хүүхэлдэй бий. Эхнээсээ салаад эхэлсээн. Байсгээд л засаж скочдоно.

Иймэрхүү зүйл хийдэг хүмүүс уншиж байвал анхаараарай. Энэ гэхдээ олон жилийн өмнө авсан болохоор. Одоо ихээхэн сайжирсан байх гэж найднам. 

Дараа нэг харихаараа хэд хэдийг авч ирнэ ээ. Мартчихгүй бол шүү дээ. Мартаад баахан ном чирээд ирж мэднэ шүү, өнөөх чинь. 

Бөхийн хүүхэлдэйг түрүү жил унагаагаад хагалсан, нэг сургуульд. Буцаагаад наачихсан. Арагшаа харуулбал мэдэгдэнэ. Ямар азаар урдах гүзээ хэсэг нь гайгүй юм тийм ээ? 

Гэр болохоор эсгийгээр хийсэн. Өрх энэ тэрийн чимэглэл бас салж уначих гэж сандаргана. Наагаад л, аргалаад явж байна. 

Мартсанаас хөөрхөн хөөрхөн захиа хүлээж авсан. Зураг хөрөг оруулна гээд л мартчихаад яваа юм байна. Сануулсанд баярлалаа. Санасанд баярлалаа. 

Энэ жилийнхээ үгүй ээ өнгөрдөг оныхоо бүхий л болсон үйл явдалдаа талархаж буй. Шинэ онд ч талархалт зүйлийг хүлээгээстэй...

Түр баяртай. Бүгдэд нь амжилт хүсье.