Их сургуульд ороход 4

Зардлын тухай үргэлжлэл шүү. 

Энэ амралтаар үрсэн мөнгөө тайлагнах гээд. 

Сургуулиас нь баахан л бичиг цаас ирсэн юм. Түүн дотор хослол авахад 20 хувь хямдрах бичиг байсан. Элсэлтэндээ өмсөнө, төгсөхдөө ажлын ярилцлаганд орохдоо өмсөнө гэнэ. 

Банзал, пиджак, хар гутал авлаа. Гутал нь хальт өсгийтэй. Залуухан хүүхнүүд ажилдаа өмсдөг, даруухан ч загвар нь нэг их таалагддаггүй надад. Тэгсэн том зулзага нэг хөөрхнийг олоод өмсөөд үзэж байна шөө. Тэгээд л авчихлаа. 

Нийт 22000 иен болсон. Цагаан сорочкон цамц аваагүй байгаа. Тун удахгүй авна. Хэ хэ. 

Үсний сэнс, индүү авсан. Өөрийнхөө мөнгөөр. 7000 иен болсон. Өөрт нь баяр хүргэж хүмүүсийн өгсөн мөнгөнөөс. Нэг мээмчик, турсик авсан. Өөрөө төлсөн. Ээж дотроо баяртай байлаа. Хэ хэ. 

Хамгийн том наймаа нь юу гээч. Ноотбүүк, принтер, флаш, анагаахын мэргэжлийн хэд хэдэн толь бичиг бүхий бяцхан тархи толь бичиг. Өөр юу юу байсан бэ?

Эхлээд л принтер энэ тэрээр яадаг юм, нетээс гайгүй ноотбүүк, толь бичиг хараад захиалъя гээд л үглэж үглэж, хань ижилтэй хагас сайнд цахилгаан барааны дэлгүүр ороод. 

Байнга шахуу ордог цахилгаан барааны дэлгүүрийнхээ, очих бүртээ элдвээр шалгаадаг залуугаасаа асуулаа. Их сургуулиас нь ирсэн каталогио үзүүллээ. Цаашаагаа яваад л, шалгаад л судлаад л байсан. 

Ирснээ "ер нь их сургуулиас нь заасан зүйлсийг авсан нь дээр юм байна. Нарийн ширийн үзүүлэлт нь маш өндөр юм байна. Гадуур бол нэг их зарагддаггүй, зүйлс байна." гэв ээ. 

Үргэлжлүүлэн "Ёстой мундаг их сургууль байна, анагаахын салбар гэхээр мэргэжлийн үг хэллэг нь ч чухал байх, энэ заасан үнэ нь ерөнхийдөө барагцаа байна." гэлээ. 

Маргааш нь захиалгын сүүлийн өдөр байсан тул, орой нь том зулзагатаа бууж өгөөд, захиал л гэлээ. Өнөөх чинь шоолоод л жуумалзаад л аавдаа ховлоод байсан. Хо хо. 

Би өөрийгөө өмөөрөнгүй "Хорвоогийн бүхэл ээжүүд ийм, ийм үнэтэй, их мөнгийг чинь нэг дор гаргах гэж байгаа юм чинь дув дуугай байна гэж байхгүй" л гэлээ. Миний зөв биз дээ? Журмын олон нөхөд өө. Хи хи. 

За тэгээд хэд болсон гэж бодож байна. 318000 хавьцаа болсон. Хүргэлтийн төлбөр энэ тэр багтаад. Шууд дотуур байрандаа хүргүүлнэ. Эндээс авч явах, дахин шуудангаар илгээх гэж бүр л илүү зардлын нэмэр. 

Яг одоогоор үүнийг төлөөгүй байгаа. Эд юмс нь очсоны дараагаар төлөх юм болов уу? Ямартай ч эндхийн шуудан банкаар төлөх юм гэсэн. 

Ирэх долоо хоногт үүрнээсээ нисэх хүртлээ дахин хэдийг үрэхийг би таашгүй. Өө тийм, унааны зардал нь үлдсэн байна. Мөн сар бүр төлөх байр, ус тог гаазных нь мөнгө үлдсэн. 

Очоод, хэрэгтэй зүйлсээ бичээд явуулаад байх юм гэсэн шөө. Бурхан гончигсумъяа миинь. 

Өө тийм, анагаахаас бусад салбар нь харьцангуй бага байдаг юм билээ, элдэв даатгал, сурах бичиг энэ тэр нь. 

За тэгээд монголд байдаг улсууд төгрөгөөр үржүүлээд тооцно биз. Эндхийн ээж аавууд мөнгөө цуглуулж эхлээрэй. 

Түр баяртай. Бүгдэд нь амжилт. 

Их сургуульд ороход 3

Энэ удаад эцэг эхийн хамгийн их сонирхдог сэдэв байх тийм үү? 

Японд нэг хүүхэд төрүүлж өсгөөд, эрийн цээнд хүргэхэд гарах зардал их өндөр байдаг тул цөөн хүүхэдтэй байх нь их. Төрөлтийн тоо цөөрөөд, хүн ам багасаад байна гэж их ярьдаг. 

Зардлын хувьд үнэн бололтой дог шүү. Цэцэрлэг нэлээд үнэтэй, бага дунд сургууль төлбөргүй, гэхдээ хоолны бас бус сурах бичгийн мөнгөө төлдөг. Ахлах сургууль төлбөртэй, улсын сургууль харьцангуй гайгүй. Мөн дүрэмт хувцас, сурах бичиг, бас бус зардалтай. 

Дээрх бол нэг дор бөөн бөөнөөрөө урсаад явах нь гайгүй байсан. Хичээлийн эхэнд мэдээж дүрэмт хувцас, сурах бичиг гээд зардаг ч үсрээд л 100 мянган иенд багтсан санаад байна. 

Гэтэл их сургуульд орох болсон яаж байна? Ахлах сургуульд байхдаа орохыг хүсэж буй их сургуулийнхаа загвар шалгалтыг өгөхөөс эхлэнэ.Том зулзага 2 шалгалт өгсөн, яг одоо орох гэж байгаа тэнцсэн их сургуулийнхаа. 2 удаагийнх нийлээд 10 мянга хавьцаа болсон. 

Бүртгэлийн мөнгө. 2 их сургуульд бүртгүүлсэн. Нэг нь л гэхэд 20 мянга хавьцаа. Үүнд материалаа баталгаат шуудангаар явуулах зардал орсон байгаа. Ерөнхийд нь базаад биччихлээ. 20 мянгаа хоёроор үржүүлээд 40 мянга. 

Эхний шалгалт орон нутагтаа болдог юм билээ. Үүнд мөнгө төллүү? Яалаа мартсан байх чинь. Дараа асууж лавлаад нэмж бичнэ ээ. 

За их сургуульдаа очиж өгөх шалгалт. Унаанд 47 мянга. Ээж цуг явсан тул хоёр хүний ирж очих зардал.

Буудаллах зочид буудлын мөнгө. Хоёр хүний 40 мянга. 2 өдөр ч болов чимээгүй орчинд байж байгаад конкурсаа өгөг гэж бодоод тусдаа өрөө захиалж орсон. Тэгэхгүй бол гэрт бид амандаа ус залгичихсан юм шиг байна гэж байхгүй тул.

Тэнцсэн. Эндээс ажил ундарна. Хэрэв тэнцээгүй бол өнөөх хоёр дахь их сургууль руугаа явдаг. Ингэвэл мэдээж энд бичигдэж буй зардал нэмэгдэнэ. Харин дээр бүртгүүлсэн 20 мянган иен бол тэр сургуульд хандив болчихож байна гэсэн үг. Хэ хэ. 

Элсэлтийн мөнгө бараг 300 мянга. Үүнд өөрсдөө төлж авахаар ирдэг бас бус бичиг цаасны зардал, шуудангийн мөнгө гэх мэт орсон.

Дотуур байранд тэнцсэн. Хэрэв тэнцээгүй бол гадуур үнэтэй байр хайна. Азаар бид бас л энэ зардлыг хэмнэлээ. Дотуур байр харьцангүй хямд. 

Дотуур байранд тэнцэнгүүт бас баахан бичиг цаас ирнэ. Элдэв янзын даатгал, өдрийн хоолны талон, сурах бичгийн мөнгө гэх мэт нийлээд 200 мянга. Өдрийн хоолны талоноо хамгийн багыг нь л захиаллаа. Өдрийн цагаар сургуульдаа хоолоо иднэ. Энэ нь бас мөнгөний хэмжээтэй. Охин хүүхэд тул багаар л тогтоолоо. Хэ хэ. 

Өө тийм, тамга хийлгэсэн. Өөрийн нэр дээр данс нээхийн тулд. 3300 иен.

За дээрх зардлуудыг нэмээд гаргахаар 627,300 иен болж байна. 

Үүн дээр төв газраас ирэхдээ багш нартаа, бас бус дэмждэг хүмүүстээ нутгийн бэлэг авсан. Төв газар өдөр оройн хоол гээд тансагласан. Нэг өмд, нэг цамц авсан. 

Эдгээрийн мөнгөө нэмээд 655,000 гэж тооцлоо. Он гараад өнөөдрийг хүртэл бид ийм хэмжээний мөнгө үржээ. Хэ хэ. 

Одоо цаана нь сургалтын төлбөр, сар бүр төлөх байр, ус тог гааз, өглөө оройн хоол, нөөтбүүк, мэргэжлийн үг хэллэгтэй цахим толь бичиг. Нээлтээрээ өмсөх хослол, үсний сэнс, их сургууль руугаа явах унааны зардал, араас нь явуулах хэд хэдэн хайрцагны шуудангийн мөнгө гэх мэт үлдсэн. 

Энэ тухай бас тусад нь бичнэ ээ. 

Тэгэхээр зөвхөн их сургуульд оруулж, үүрнээс нь нисгэхийн тулд дор хаяж 1 сая 500,000. Чадвал түүнээс дээш хадгаламжтай байх шаардлагатай байх нь ээ.

Ингээд бодож сууна. Ямар азаар хол зайтай төрүүлээ вэ ? гэж. Ойрхон бол сэхэл авч чадалгүй л дараагийх нь их сургууль гээд явах нь байна шүү дээ гэж. 

За японд сурах, сургах сонирхолтой хүмүүс багцаа авна биз дээ. Энэ улсын сургууль тул хямддаа орно шүү. Хувийн сургуульд орох гэж буй бол үүнийг 2 эсвэл 3-аар үржүүлж бодох хэрэгтэй гэсэн шүү. 

За тэгээд том маамаатай ээж аавуудаа амжилт хүсье. Түр баяртай.

Төгссөний дараа

Энэ удаагийнхаа бичлэгээр ахлах сургуулиа төгссөн хүүхдүүдийн тухай бичнэ ээ. 

Эндхийн сургууль цэцэрлэгүүд дотоод дүрэм журам ихтэй, чанга байдаг. Жишээ нь үсээ будаж болохгүй, хумсаа будаж болохгүй. Чихээ цоолж болохгүй. Охидын банзлын урт өвдөгнөөс ялимгүй доош байх ёстой ч гэдэг юм уу? 

Өөр чинь юм билээ? Төв газраар охидын дүрэмт хувцасны банзал нь богино байвал тэр нь сургуулиасаа гарангуут банзлаа дээш нь шуучихдаг шиг байна лээ шүү. Хэ хэ. 

Арван жилд байхад ангийн хэсэг охид бас тэгдэг байсан. Тухайн үедээ аальгүй охид л тэгдэг гэж боддог байлаа. Одоо ч бас адил дөө. Эндхийн гуя хасаа гайхуулсан зарим нэг охидыг хараад тэгж боддог. Ингэж бичээд ялгаварласан хэрэгт орох вий дээ. Хо хо. 

Оршил нэг иймэрхүү. Том зулзага үсээ арай ч будчихсангүй. Хэ хэ. Харин чихээ цоолуулсан. Эмнэлэгт 3000 иенээр цоолдог юм байна. Энэ мөнгөө өөрөө гаргасан. Өөрт нь баяр хүргэж мялаасан мөнгөөр. 

Хүмүүс хэрхэн баяр хүргэж, мялаадаг тухай дараа бичнэ ээ. 

Мөн сургуулийн чанга дүрэм журмаас ангижирсан охид, залуус ёстой л уяа нь алдуурсан нохой гэдэг шиг, шоуддаг бололтой. 

Том зулзагын ангийн нэг охин караокед орж үзээгүй гээд оюутан болоод явахаасаа өмнө найзуудтайгаа орж, доторх засал чимэглэл, дуугаа захиалах арга зэргийг мэдэж авна гэсэн гээд хамтдаа нэг өдөр караокедсон.

Мөн боулинг тоглосон. Хэ хэ. 

Хувцаслалт нь бас чөлөөт хувцас их болж ирсэн чинь хувцасгүйгээ гайхсан хүн байна. Урд нь дүрэмт хувцсаа өмсчихдөг байсан тул их амар байжээ. Одоо ойрхон гарсан ч чөлөөт хувцас, шкаф дүүрэн хувцаснаас нь өмсөх юм олдохгүй гэх мэт. 

Охин хүүхэд юм даа аргагүй гэж л бодож сууна даа. 

За том зулзагатай эцэг эхүүд минь хичээгээрэй. Амжилт хүсье. Түр баяртай.

Их сургуульд ороход 2

Энэ удаад эцэг эхийн зүгээс юу бэлдэх, анхаарах талаар товчхон бичнэ ээ. Улам дэлгэрүүлж мэдмээр байвал өөрсдөө нетээс сайн хайж унш, орохыг хүсэж буй их сургуулийнхаа цахим хуудсаар сайн зочил гэж хэлнэ дээ. 

Мэдээж эхний удаадаа бол хүүхдээ сайн сонсох, ямар чиглэлээр явах хүсэлтэй байгааг нь асууж, ярилцах. Танд таалагдахгүй ч хүүхэд чинь сонирхож байвал хүндэтгэн сонсох, ярилцах. 

Нэг их хүчээр биш ч номын сангаас, зурагт болон бусад мэдээллээр ирээдүйд эрэлт хэрэгцээ ихтэй ч юм уу, хүүхдэд чинь таарч тохирох байх гэсэн ажил мэргэжлийн талаар ном товхимол зэргийг санамсаргүйгээр нүдэнд нь өртөхөөр, сонорт нь хүртэхээр байлгах. 

Өөрөө уншиж үзэх, судлах. Уншихгүй байсан ч уншиж буй дүр эсгэх хэхэ. Би бол сүүлийнх нь байсан шөө.

За тэгээд хичээлээ хийхэд нь саад болохгүй байх. Бүхий л зүйлээр нь дэмжих. Гэрийн ажилд ч бага оролцуул, бага хийлгэ. Хэ хэ. Харин наана нь бол сайн хийлгэж сурга, зааж өг. 

Төгсөх ангид нь л юу ч битгий хийлгэ. Яахав өөрөө хийх хүсэлтэй бөгөөд, хичээл гэрийн ажил хоёрыг зохицуулж чадаж байвал хамаа алга, хийлгээрэй. 

За тэгээд мөнгөө сайн хэмнэ. Бүр тусад нь нэр дээр нь данс нээж сар бүр хадгалдаг бол бүр сайн. Би энд тэгж данс нээгээгүй л дээ. Яахав байнга гүйлгээ хийгддэгээс тусдаа, тэр бүр салбар нь олон биш банкинд хадгаламжийн данс нээгээд, хадгалдаг байсан. 

Аан тийм зулзагууд бага үед бол сайн цааш нь хийдэг байсан. Томрох тусам, гэр бүлийн гишүүд нэмэгдэх тусам цааш нь хийж хадлагалах тоо багасна. Бүр боломж ч гарахгүй. 

Сүүлийн хэдэн жилд бол бид хадгаламжийн данс руугаа нэмэх нь битгий хэл, авах нь олшрох тийшээ байсан. Тэгэхээр зулзагуудаа бага дээр нь сайн хадгал гэж хэлье дээ. 

Тансаг хэрэглээг тана!!!

Эцэст нь хэлэхэд хүүхдээ аль болох бага байхад нь сайн тулж ажиллаад, ширээний ард хэдэн цагаар ч хамаагүй хичээлээ нухаад суудаг болгоод сургачихсан байхад болох юм шиг санагдсан. 

Одоо хоёр дүүтэй нь тулж ажиллах л үлдлээ. Дунд зулзагаа сууж сургах нь эхний шат. Бага зулзага одоохндоо хөдөлж л байг. Ккк.

За дараагийн бичлэгт юу юунд хэдэн төгрөг зарж буй талаар бичнэ ээ. 

Түр баяртай, бүгдэд нь амжилт хүсье.

Их сургуульд ороход

За юуг их анхаарах вэ гэхээр? Их л эртнээс чиглэлээ сонгоод, бэлдээд, хичээлээ хийгээд явах ёстой шиг байна. Хүүхдийн хувьд. Бүр дунд сургуулиас нь бага багаар чиглүүлж өгсөн. Өгсөн ч гэж дээ, багш болон сургуулийн үүрэг асар өндөр байсан.

Өөрийн сонирхол, нийгмийн эрэлт хэрэгцээ гэх мэтийг ерөнхийд нь сургууль чиглүүлээд өгчихсөн. Том зулзагын хувьд. Ээж аав хоёртой бол "Тэгвэл ямар уу? ингэвэл ямар уу?" гэж хальт асуух, тандах маягтай л ярилцсан. 

Өөрийнх нь сонголтыг хүндэтгэн, ганц нэг санал бодлоо бол хэлсэн. Түүнээс учиргүй тэг ингэ гэж заагаагүй, зааварлаагүй. Өөрийн л амьдрал, өөрийн сонголт учир, сүүлд өөрөө л хариуцлагаа үүрнэ гэдэг хандлагатайгаар хандлаа би ч.

Сүүлийн нэг жилийн хугацаанд бол гадуур дотуур нэг их зугаалалгүй, тэнэлгүй, сургууль-гэр-тооны нэмэлт хичээл гэсэн маршрутаар л явлаа. Ашгүй гэх юм уу? Корона гарч, орж гарах дуртай ээж аавын үйлдлийг ч хянаад, томоотой болгож өгсөн. Хэ хэ. 

Бэрхшээлийг боломж гэж харна гэдэг нь энэ үү? Одоо юу гэх үү? Ха ха. 

Мөн манайхаар ирэх дуртай өвөө эмээ нарыг ч энэ корона бас хязгаарлаад. Гэхдээ энд, конкурсны зулзагатай айлаа маш их хүндэтгэж хүлээж авдаг гэж хэлсэн дээ. Хичээл хийхэд нь саад болж орж гараад байхгүй, эсрэгээрээ чимээгүйхэн дэмжээд явдаг. 

Үүдний бариуланд шинэхэн талх, шинэхэн өөрсдөө хийсэн бялуу гэх мэт зүйлсийг өлгөчихөөд л яваад өгнө. Явсынхаа дараагаар мэссэж бичнэ. Тэгэхээр хэнээс ирж гэдэг нь мэдэгдээд, баярласнаа хэлнэ. Хи хи. 

Манай хөдөөгүүр ийм байлаа. Хот газрынхныг сайн мэдэхгүй шүү. Том том орон сууцныхан чинь хөршүүдээ мэдэхээ байсан гэж ярих юм билээ. 

За тэгээд хүүхэд л их мэрийж, мэдээлэл сайтай, зорилготой, их суудаг байх ёстой юм байна шүү. Номтой, сурах бичигтэйгээ сайн нөхөрлөх. 

Бас нэг том нөлөөтэй санагдсан зүйл нь багшийн нөлөө. Том зулзага дунд сургуульд байхдаа хими физикийнхээ багшид дуртай байлаа. Ахлах ангид ороход анги даасан багш нь тооны багш байлаа. Мөн л энэ багшдаа хайртай дуртай байлаа. 

Ингэж багшдаа дурлах нь хичээлдээ дурлах, тухайн хичээлээ хийх, шамдахад асар их нөлөөлдгийг энэ удаагийн туршлагаараа мэдлээ. Одоо хоёр дүүд нь бас ажиглалтаа хийгээд, багшийг нь муулалгүй, эсрэгээрээ магтаад, ээж нь ч хайртай шүү багшид нь гээд явна даа. Хо хо.

Өөр нэг хүчин зүйл бол ээж аавын үндсэн чиг хандлага. Зөв л байх ёстой санагдлаа. Өөрсдөө үг үйлдэл буруу бол хичнээн хүүхдэдээ зааж зөвлөөд бол нэмэргүй тийм үү. Түүнээс ээж аав нь бас заавал толгойтой, мундаг их сургууль төгссөн байх албагүй. Амьдралын үндсэн чиг хандлага, гэртээ зулзагууддаа үзүүлэх үлгэр дуурайлал зөв байх. Ккк. 

Хань ижил бид хоёр энд хүмүүс шиг мундаг их сургууль төгсөөгүй, мастер доктор хамгаалаагүй. Хүмүүсийн шуугиад байдаг шиг том том газарт ажилладаггүй. Эгэл жирийн ажил л хийдэг, ажилчин анги өө...

Аая өөрсдийгөө магтчихлаа. За яахав ээ яахав. Тэгж яривал японд их дээд сургууль төгсөөд харьсан хоёр дүү найзууд утасдаад "Яаж та хоёр шиг болох уу? Хүүхдээ японы их сургуульд, япон хүүхдүүдтэй өрсөлдүүлээд тэнцүүлчихдэг" гэж магтсан шөө. Хи хи. 

Мөн конкурсны маамаа нарт зөвлөхөд ээж аавыгаа бодож байна гээд, тэр байнга шахуу явагддаг их дээд сургуулийн төлбөртэй шалгалтнаас хойш сууж болохгүй. Хэрэгтэй гэсэн ном сурах бичиг байвал нэрэлхэлгүй хэлээд авахуулж байх. 

Асуух зүйл байвал сэтгэгдэл үлдээгээрэй. Дараагийн бичлэгээр үргэлжлүүлнэ ээ. Түр баяртай. Бүгдэд нь амжилт хүсье.

Гүзээлзгэнэ

Төв газрын амттан. Шалгалтаа өгчихөөд том зулзага бид хоёр бага зэрэг санаа амраад, амттан идсэн нь гэдэг зураг. Хэ хэ. 

Төв газраар яваад байна гэдэг маань конкурсаа өгөх гэж явсан юм аа. Гадарлаж л байсан байх тийм ээ? Зарим нэг уншигчид маань. Хариу энэ тэр гартал нь нууц байлгах санаатай л. 

Тэгсэн мөртлөө бас бичээд л. Яг яах гээд байгаа юм тийм эээ?  Хэ хэ. 

Явсан газрын төвөөр гүзээлзгэний баяр болоод, олон газар гүзээлзгэнэтэй амттан гаргасан байсан. Хүүхнүүд л болсон хойно, амттанаас буцахгүй...

Ингээд тавьчихаар идмээр санагдана биз дээ? Гэснээс суугуул нутагт минь ч гэсэн гүзээлзгэнэ улирал нь. Жаахан үнэтэй л болохоос дэлгүүрүүдэд их зарагдаж байна аа. Гэхдээ төв газрынхыг бодвол хямд шүү. 

Бид сая төрсөн өдрөөр авч идсэн. Бага зулзага нугасгүй. Дуусахаас нь өмнө гээд л авч идээд байсныгаа түр зогсоосон. Элсэлтийн мөнгө энэ тэр гээд л мөнгө их урсаж байгаа болохоор. Хи хи. 

Амттай байсөөн. Гүзээлзгэнээ дангаар нь идэх нь илүү эрүүл, биеийн минь хаа нэгтээ өөх болоод наалдчихгүй гэж мэдээд байгаа хэрнээ л иймэрхүү амттан олоод идчихдэг ээдээ энэ хүүхнүүд үү? 

Дараагаар нь хөвсгөр болсноо гайхаад л тийм ээ? Ха ха. 

Миний идсэн амттан. Хажуунаас нь дарсан байдал. Гайхуулчих уу? Ккк. За за тоглосон юм аа, гайхуулаагүй шөө. Амттан хийдэг хүмүүс байвал санаа аваарай л гэж. 

Ажлын газрын маань амттан хийдэг хятад ажилтан байдаг гэсэн дээ. Иймэрхүү амттаны зураг их авдаг юм билээ. Санаа авах гэж тэр гэсэн. Хааяа хажуугаар нь өнгөрөхөөр амттаны зураг энэ тэрийг нетээр шалгаж харагддаг юм.

Тэгээд хийдэг хүмүүст иймэрхүү зураг шинэ санаа оноо өгдөг юм байна гэж ойлгосон. 

Их ажлынхаа хажуугаар бас блогоо бичих гэж хичээж байгаа шүү. 

Түр баяртай, бүгдэд нь амжилт хүсье.

Давхар баярууд

Их л олон баяр болоод өнгөрлөө. Эмэгтэйчүүдийн баяраас авахуулаад. 

Бид эмэгтэйчүүдийн баярыг нэг их тоож тэмдэглээгүй ээ. Гэрт минь эмэгтэйчүүд олон, эрх дарх нь ч их шүү дээ. Өдөр бүр мартын 8 гээд хэлчихэд илүүдэхгүй ээ гэхгүй юу. Хи хи. 

Хань ижил харин ханьтай болсон гээд баярлаад байгаа ч, одоохондоо өнөөх нь бат ээжийн талд шүү дээ. Ккк. 

Хамгийн том баяр нь конкурсны зулзагын минь хариу байлаа. Их сургуульдаа тэнцсэн шүү, манайхаан. Бид бөөн баяр. Бага зулзагын төрсөн өдөртэй давхцаад, бид ч бөөн баяр. 

Ямартай ч нэг том даваагаа давлаа. Эхний орно гэж хүссэн их сургуульдаа тэнцсэн тул дараагийн шатны юмыг яаж мэдэхэв гэж сонгосон их сургууль руугаа яваагүй. Захиалсан зочид буудлаа цуцаллаа. 

Энд конкурсны хүүхдүүд хоёр их сургуульд бүртгүүлдэг юм билээ. Эхнийх нь өөрийн хамгийн их орохыг хүсэж байгаа, мөн хамгийн чухал нь өөрийнх нь хүчин чадалд нийцсэн гэх юм уу? өөрөө өгч дийлнэ гэсэн сургууль сонгодог юм билээ. 

Хэрэв тэнцэхгүй бол гэж Б вариант бас байна. Тэр нь хувийн сургууль ч байж болно. Улсын сургууль ч байж болно. 

Том зулзага хоёуланг нь улсын сургууль сонгосон. Учир нь хувийн сургууль их үнэтэй. Дээрээс нь байр орон сууц, хоол унд гээд л хэрэглээ их, зардал өндөр тул улсын сургуульд л ороорой гэж захьсан. Захиасыг минь ч биелүүллээ. 

Бага зулзагаа мартах гэж байна. Бялуугаа маш сайн идсэн. Өглөө сэрээд л кээки гэсэн. Хо хо. Маргааш өглөө нь бас кээки гэж нэхсэн. Ха ха. Бэлэг нь их таалагддсан. Том эгч нь сонгосон. Ухаан бодлыг нь тэлдэг зүйл л авч өгч байгаарай даа, хамаагүй эрхлүүлээд байв даа гээд л захиад байна. Хэ хэ. 

Өөрөө үүрнээсээ нисээд явах гэж байгаа болохоор үлдэж буй дүү нартаа бас санаа зовоод л байх шиг байна шүү, янз нь. Энд бид өөрт нь санаа зовоод суухад. 

За ямартай ч хамгаас том сонингоосоо хуваалцлаа. Том маамаатай ээж аавууд минь мөнгө л сайн хадгалаарай даа. Энэ тухай тусад нь бичнэ ээ. Урсаж өгч байна, мөнгө...

За бүгдэд нь амжилт хүсье. Түр баяртай.

Хэлд ороод сүйд

Маасү-итадакимас, онэгайшимас гэдэг үгний товчлол. Товчлол ч гэж дээ, бүтнээр нь хэлж чадахгүй, ингэж хэлдэг. 

Кэки-Бялууг хэлж байгаа нь. Нэг тийм сонин, к үсгээ тод хэлдэг. Э үсгийг богино хэлдэг. 

Коопэ-Ээж кофечин тул их сайн мэднэ шүү дээ. Намайг аяга бариад суухаар коопэ? гэж ирээд л асууна. 

Цэцэгү-Цэцэг гэдгийг япон дуудлагатай хэлчихэж байгаа нь. Япон хэлтэй улс сонсоод бол өхөөрдөх байх аа. Хэ хэ. 

Тарагү-Тараг. Мөн л япон дуудлага. 

Намэ-Дамэ гэдэг япон үг. Болохгүй, үгүй гэх мэт утгатай. 

Өө яг ингээд бичээд суусан чинь санаанд ордоггүй гэнэ ээ. Ямартай ч үгсийн тоо олшроод. Ээж гүйцэхгүй янзтай. 

Ихэнх үгийг зөв хэлнэ. Энд буруу хэлдэг үгсийг нь өхөөрдөөд бичлээ. Сүүлд том болсон хойно нь хааяа бид тэр буруу хэлдэг байсан үгсийг нь хэлэхээр ичээд, тэгсэн мөртлөө дуртай байдаг юм билээ, хүүхдүүд. 

Тийм болохоор санаж байх зорилготой эндээ бичиж буй болно. 

Хурдан хэлд орж буй тухай нь эмээтэй нь хуучилсан чинь ээж аавын онцлогтой их холбоотой шиг байна шүү. Ээж бол бас л чалчаа талдаа орно. Бас нэлээд хурдан ярьдаг талдаа. Заримдаа охид "ээжээ та жаахан удаан ярь" гэдэг. Хи хи. 

За тэгээд ном их уншиж өгдгийн минь хэрэг гарч байх шиг. Мөн цэцэрлэг дэх багш нарын яриа, багш нарын уншиж өгч буй ном гэх мэт зүйл маш том нөлөө үзүүлдэг шиг. Ардын багш нар мандтугай. 

Тэгэхээр залуу ээжүүд минь хүүхэддээ ном сайн уншиж өгөөд, сайн ярилцаад, гар хуруугаа оролцуулсан дуу хуур, тоглоом сайн тоглож байгаарай гэж туршлагатай ээжийн хувьд зөвлөчих үү дээ. 

Түр баяртай, бүгдэд нь амжилт хүсье. 

... насны ой

Удахгүй бага зулзага 2 ойтойгоо золгоно. Сурсан эрдэм гэж мундахгүй их болжээ. Энэ талаар нь хальт сараачих санаатай. 

Өмдөө, гутлаа өөрөө өмсөн сурсан. Гутлаа хааяадаа зөрүүлээд өмсчихдөг. Үдээсгүй гутал тул амар. Наагаад л салгаад л болчихдог. Албанд нь өмсөхөд, тайлахад амар гутал гэж заадаг болохоор. 

Энд мөн үдээстэй гутал ховор өмсөнө дөө. Томчууд ч тэр. Хот газар гэхдээ арай өөр юм билээ шүү. Миний бичсэнийг уншаад япон улсыг тэр аяар нь төсөөлөв өө. Би хөдөөний хүн шөө. Хи хи. 

Өмдөө өмсөхдөө хаа нэгтээ хоёр хөлөө нэг лүү нь зэрэг чихээд байдгийг эс тооцвол, өмсчихдөг болсон. 

Нэлээд дээхэн цамцаа хөлдөө углачихаад өмсөх гэж зүтгээд байсан. Одоо цамц гэж толгойгоороо өмсдэг гэж мэдсэн байх шиг  харагдана лээ. 

Үгийн тоо нэмэгдсэн. Ээж аав, эгч гэдэг үгсийг хоёр хэлээр хоёулангаар нь хэлдэг болсон байна лээ. 

Хөдөлгөөн нь эрс нэмэгдсэн. Нэг зүгээр суухгүй байна. Гурав хоног яваад ирсэн чинь жаахан хаширчихаж. Юм л бол ээжээр тэврүүлэх гэж зүтгээд байна. Ээж гэрийнхээ нэг буланд очоод, өөрт нь харагдахгүй л бол ээж хаачсан бэ гээд хайгаад, асуугаад явдаг болсон. Хэ хэ. 

Өө тийм, нус нь жаахан гоожоод байгаа юм. Тэгсэн нусаа долоогоод байдаг болсон. Бүр хамраа ухаж байснаа хуруугаа долоож энэ тэр. Эгч нар нь пүү паа уулга алдаж энэ тэр. Өөрсдөө ч гэсэн долоож л явсан юм байж. Ха ха. 

Саяхан ээлжит жүжгээ үзсэн чинь нэг их тогтож үзээгүй. Өөр зүйлд сатаараад. Нас нь арай болоогүй ч байж магад. Гэхдээ цэцэрлэгтээ бол багш нарын жүжигчилсэн тоглолтыг сайн шимтэж үздэг гэсэн. 

Номонд дуртай хэвээрээ. Хааяа ээж залхуурдагийг эс тооцвол. Зарим нэг номоо цээжилчихсэн уншиж өгдөг. Дууны үгийг бага багаар ахиулаад л байна. Хөөрхөн эвсэлтэй дуулдаг болсон. Гар хуруугаа хөдөлгөж хүүхдийн дууг эвлэгхэн дуулж сурч байна. Албанд явахын нэг ач гавъяа юм шүү дээ гэж талархах сэтгэл дүүрэн.

Бялуу иднэ гээд л байгаа. Бид ямар бялуу авч өгөх үү? Ямар бэлэг өгөх үү? гэж ярилцаад л. Эгч нар нь саналаа хэлэлцээд, сонгож өгөх юм гэсэн. Мэдээж худалдаж авахыг нь ээж аав. Хэ хэ. 

Өө тийм зурахдаа улам л сайжраад байгаа. Инээж байгаа нь уйлж байгаа нь гэж ирээд л тайлбарлаж өгдөг. Бүүр нэг өхөөрдөм, хайр хүрэм. 

Жаахан тойм, бүдэг зүйл биччих шиг боллоо. СБА шүү. 

Бүгдэд нь амжилт хүсээд, түр баяртай.

Унааны зардал

Хөдөө газраас хот газар орохын нэг бэршхээл нь зардал тийм ээ? Бид сая 2 хүний унааны зардалд овоо хэдэн иен төлөөд бодлоо. 

Зочид буудлын төлбөрөөс үнэтэй болсон гээд боддоо. Буудал нь бас ч гэж өглөөний хоолтой. Галт тэргэнд ямар хоол өгөх биш тийм ээ? Олон улсын онгоц байсан бол ч хоолтойгоо. 

Орон нутаг доторх нислэг хоолгүй байх тийм үү? 

Замдаа унаагаа нэг сольж шинкансэн гээч хурдан цахилгаан тэргэнд суусан. Аргагүй хурдан юм аа, зорьсон газартаа нэг их цаг зарцуулалгүй хүрчих юм. Суугуул муж минь шинкансэн явдаггүй болохоор экспрэсс галт тэрэг нь тийм ч хурдан хүрэхгүй ээ. 

Цаашаа явахад. Уншаад дууссан ном, унтаж магад гэж том зулзага авч өгсөн хийлдэг дэр. Дэрний хэрэг нэг их гараагүй. Унтаагүй, ойрд ажил гайгүй, нойр сайтай байсан юм байлгүй.

Бидний суусан шинкансэн биш. Хаашаа ч билээ явсан. Тогтоож амжаагүй, тэр бүр суухгүй тул хамаг мэдрэхүйгээ ажиллуулж, суух газраа төөрч будлихгүйн тулд, цагаа андуурахгүйн тулд гээд сандраад байсан хэрнээ зураг дараастай. Хэ хэ. 

Зайтай гар байна уу? Монголоор бол зайтай эр ээ гэж хэлэх үү? Ийм үед. Японоор ч бас нэг тиймэрхүү хэллэг байдаг шиг. Гэхдээ яг зай гэдэг үг биш юм байна. Тайван, сандраагүй, илүүдэл,бололцоо гэх мэт олон утгатай үг хэрэглэдэг.

Энэ хурдан цахилгаан тэрэгний зургийг эмээ өвөөд нь явуулсан. Японд ирэхдээ сууж үзээгүй тул. Сонин байж магад гээд. Хөдөө газраар л голцуу зугаалуулсан тул хот газрын энэ мэт хөгжлийг зураг хөрөгнөөс л хардаг тэд минь.

За нэг иймэрхүү. Эх оронд минь хөөрхий хөдөөнийхөн оркоороо дуудуулаад л байдаг даа. Би ч бас оркоороо дуудуулчихгүй юмсан гэж хичээж яваад ирсэн шөө. Ха ха. 

Түр баяртай, хотынхон минь хөдөөний биднийгээ орк энэ тэрээр минь бага шиг дуудаж байгаарай даа. Адилхан хүн шүү дээ, хоёр хөлтэй хохимой толгойтой...

Бүгдэд нь амжилт.

Тогоруу

Явсан газрынхаа сэтгэлд хүрсэн зүйлээс танилцуулах санаатай.

Зочид буудлын сонин. Үйлчилгээ нь эндхийнхээ зочид буудлуудаас нэг их ялгагдаад байх зүйл байхгүй л дээ. 

Өрөөндөө ороод, анзаарсан нэг зүйл бол энэ тогоруу. Хөдөө газрын уламжлалт халуун рашаантай буудал зэрэгт ийм уламжлалт урлагийн зүйлс чимж тавьсан тохиолдолд зөндөө л дөө. 

Харин төв газрын орчин үеийн? талдаа буудлууд тэр бүр уламжлалт зүйлс харагдах нь ховор. Мэдээж бүгд биш л дээ. Сүүлийн үед өөрчлөгдсөн байх. Би ч хот газрын зочид буудлаар оролгүй удаж байна өө. 

Орны толгой нэг ийм хөөрхөн тогоруу нугалаад тавьчихсан байсан. Бэлэгшээгээд тэмдэглэлийн дэвтэртээ хавчуулчихсан. Тогоруу шувуу нь урт удаан насны бэлэгдэл, аз жаргал, баяр баяслын бэлэгдэл гэж үздэг болохоор нь тэр шүү дээ. 

Зорьж ирсэн ажил минь бүтээсэй гэж залбираад, хүлээгээд л сууна. Хариу нь бас их удаж гарах юм аа. Нийт япон улс даяар л тийм байх шиг байна. Догдлоод, санаа зовод, айгаад гэх мэт. 

Гэснээс би оригами-р энэ тогорууг нугалж чадна шүү дээ. Бас бус зүйлж хийж чадна. Ойрд харин зулзагууд томроод завгүй, бага арай л жаахдаад оригамигаар занималдаагүй юм байна. 

Бага зулзага жаахан томрохоор тэртэй тэргүй занималдах байх. Онцлог нь агуулга нь өөрчлөгдөх байх. Цэцэг хуар биш од сэлэм, онгоц машин болох байх даа тийм ээ?

Түр баяртай, бүгдэд нь амжилт хүсье.

Төрсөн өдөртэй сар

Энэ гурван сард хоёр зулзагын минь төрсөн өдөр болно оо гэж. 

Түрүүлээд цэцэрлэг нь тэмдэглэчихлээ. Учир жанцанг нь байнгын уншигчид минь мэдэж байгаа байх тийм үү? 

Тухайн сард төрсөн хүүхдүүдийнхээ төрсөн өдрийг хамт нь тэмдэглэдэг гэж. гарын алганы хэлбэрийг будганд түрж байгаад буулгасан, мөн зураг бүхий, багш нарын мэндчилгээ бүхий каарт өгнө. 

Түүнийгээ үзүүлээд, сүйд хөөрхөн минь. Цаанаа л нэг маадгар. 

Энд 4 сараас дараа жилийнхээ 3 сар хүртэл хүүхдүүдийг нэг онжав гэж үздэг. Тийм болохоор бага зулзага төрсөн өдрөө хамгийн сүүлд тэмдэглэнэ. Ангийнх нь бас нэг хөөрхөн хүү 3 сард төрсөн юм билээ. 

Үүдэн дэх том дэлгэцэнд зураг нь хөвөрч урсаад л, харих болгондоо түүнийг харж баясаж байна. 

Коронагаас болоод үүднээсээ л хүүхдээ өгч авалцаж байгаа. Анги ангид нь хүргэж өгөлгүй. Өглөөд ажилтай, яарж байхад бол их зүгээр, цаг авахгүй. хэ хэ. 

Тийм болохоор цэцэрлэг нь үүдэндээ том дэлгэц байрлуулчихсан. Төрсөн өдрөө тэмдэглэсэн хүүхдийн зураг хөрөг оруулна. Элдэв мэдээлэл оруулна. 

Бас нэг аятайхан зүйл нь саяхнаас өдрийн хоолны зургийг мэссэжээр илгээдэг болсон. Дотогшоо орж өдрийн хоолны дээжийг харж чадахгүй үед их зүгээр. 

Өөр чинь юу билээ. Аан тийм төрсөн өдөр нь гээд бялуу энэ тэр аваачиж өгөхгүй ээ, ээж аав нь. Хориотой. Харшил энэ тэртэй хүүхэд их учир. Харшилтай хүүхэд их байдаг юм билээ. 

Тийм хүүхдүүд тусгай асуулга бөглөөд, харшилтай зүйл нь ороогүй хоол иднэ. Цаанаас нь бэлдэж өгөх ч тохиолдол ч бий, өөрсдөө гэрээсээ авч явах ч тохиолдол бий. 

Зулзагууд минь одоогоор харшилгүй, ээж баярлаад, талархаад л явдаг даа. 

Баярын эзэн зулзага минь сахилгагүй болж байна. Хөдөлгөөн нь нэмэгдээд, үг яриа нь ч нэмэгдээд. Зүгээр суухгүй, дуугай суухгүй, байнга хөдлөөстэй, байнга шулганаастай. Хэ хэ. 

Яг төрсөн өдрөөр нь бялуу энэ тэр бэлдэх гэж ээж жаахан бажигадана даа. 4 сараас нэг анги дэвших том агаа болж байна даа. Энэ анги дэвших талаар тусад нь бичнэ ээ. 

Түр баяртай, бүгдэд нь амжилт хүсье. 

Төв газар 6

Хоёр дахь өдрийн хоол. Өдөр л хоол идсэн. Орой нь хооллоогүй. Эртхэн унтах минь, бас хөдлөхгүй болохоор хоол шингэхгүй. Цатгалдаад. 

Галт тэрэгний буудал хавиар эргэлдсэн тул тэнд байгаа зүйлсээс л сонгоно. Гурилан бүтээгдэхүүн орсон хоол унд их байсан. Гоймон, гурил гэх зүйлд дуртай юм болов үү? иргэд нь гэж таасан. 

Үүнийг би захиалсан. Сам хорхойтой, бяслагтай gratin. Монголоор юу гэж хэлэхээ мэдэхгүй байна өө. 

Төмстэй gratin. Амссан, төмс нь ёстой гого амттай байсан. Гэснээс манайхан төмсөнд дуртай тийм ээ? Орос ах нарын нөлөө байх даа. Ээж аав дуртай болохоор зулзагууд бас дуртай. 

За муу хүн юм болохоор идсэнээ л оруулчихлаа. Заримдаа гэхдээ боддог, идэхийн тулд амьдраад байна даа гэж. Хэ хэ. 

Тийм л биз дээ? Цагаан сараар бууз банш, өвөл идэш ууш, зун нь цагаа ногоо гээд л тувт л идэх юм бодоостой, хийгээстэй...

Удахгүй төв газар гэсэн бичлэг дуусах байх аа, сонирхолгүй бол алгасаарай таминь ээ. 

Бүгдэд нь амжилт хүсээд түр баяртай.

Төв газар 5

Явсан газрынха сонингоос дуулгах гээд л ядаад байгааг минь ойлгож байгаа байх тийм үү? Хэ хэ. Гэхдээ хүнд хэрэгтэй мэдээлэл ховор юм даа. Газрынхаа нэрийг дурсах гэснээ азнасхийгээд байна, ойлгоорой. 

Буудалласан АПА зочид буудлын өглөөний цайгаа уусан рестораны булангийн ханын чимэглэл. Сүлжмэл таваг шиг, нэг бол таг шиг зүйлийг ханандаа тогтоочихсон, зүгээр л. 

Гэхдээ бас өвөрмөц л харагддаг юм билээ. Хэ хэ. Заавал тэнгэрт хадсан үнэтэй зүйлээр чимэглэх шаардлагагүй, харах өнцгөө өөрчил гэж л энэ байх даа тийм ээ?

Төв газрын унааны зогсоол. Бас л хөөрхөн шийдэл. Дугуй их алга болдог гэсэн. Нэг таньдаг залуу Токиод байхдаа түгжээгүй орхисон дугуйг унаад явчихдаг байсан гэж авсан. Ха ха. 

Энд ирснээ бас тэгээд, загнаад. Жижиг газар, шууд баригдана, эх орны чинь нэр гарна бла бла. Үглээ юм болохоор тэгсгээд зайгаа барьсан байх. Харьцахаа больсон. Хо хо. Одооны залуус хүнээс үг сонсож сураагүй? 

Нэг бол тэр хулгайг нь дэмжих ёстой байсан юм болов уу? Бүү мэд. Ойлгохгүй байгаа. 

Аан тийм, бас конбини энэ тэр гээд дэлгүүр ороод гарахдаа хүний шүхэрийг туучихдаг хүн бас байна, суугуул нутагт минь. Дэргэдэх япон хүмүүс нь мэддэг, бүр гадаа машиндаа "Одоо харж байгаарай, орж худалдаа хийх гэж худлаа орно, тэгээд юу ч авалгүй гарч ирээд шүхэр аваад явна" гэж хажуудах монгол залууд хэлж байна гэсэн. 

Яг л хэлснээр нь болсон гэсэн шөө. Өмнөөс нь яс хавталзаад л сонссон. Эх орны минь нэр гарна аа гэж. Монголчууд гэж өлөн хүмүүс гэж ярьдаг байх даа, бурхан минь...

За за эерэг зүйл бичих гэхээр хааяа бас ийм сөрөг зүйл биччих гээд байх юм. Гэхдээ л хэлж байхгүй бол. Үүнийг уншдаг, ирээд удаагүй, ирэх гэж байгаа гэх мэт залуус минь үйлдлээ, үгээ хянаж зөв яваарай даа. 

Түр баяртай, бүгдэд нь амжилт хүсье.

Төгсөлт

Гурван сарын нэгэн. Ахлах сургуулийн төгсөлтийн баяр болов. Баба вируснаас болоод эцэг эхийн төлөөлөл гэж нэг л хүн орно. Ээж явлаа. 

Мөн тамирын зааланд болсон арга хэмжээний дараагаар болдог дурсгалын хичээлд эцэг эх орсонгүй. Жаахан харамсалтай. Одоо яалтай? Жавхлан юм даа билүү?

Захирал багш үг хэлээд,  уригдсан зочдын төлөөлөл үг хэлээд, эцэг эхийн зөвлөлийн дарга үг хэлээд, үлдэж буй дүү нарын төлөөллөөс үг хэлээлд, төгсөж буй сурагчдын төлөөл үг хэлээд, нэг нь төлөөлж захирлаасаа гэрчилгээгээ гардаж авсан. 

Бүгд амны хаалттай. Орохдоо гараа ариутгасан. Халуунаа хэмжсэн. 

Хувцаслалт тал дээр ихэнх нь хар бараан өнгийн хослолтой. Энгэртээ цагаан цэцэг бүхий чимэглэл хатгасан. Ээжүүд цагаан сувдан ээмэг, хүзүүний зүүлт зүүх нь элбэг. 

Тоон дотор үсэг гэдэг шиг кимонотой ээж, цагаан, цайвар өнгийн хослолтой ээжүүд ч харагдсан. Ер нь хослол бол ямар ч яахав гэдэг шиг байгаа юм. 

Би ч юбка минь орох байгаа гэж санаа зовоод байсан чинь ашгүй орсон. Ха ха. Мэдээж бага зэрэг чихээстэй. Аргагүй сүүлийн 2 жил гаран өмсөөгүй, бага зулзагаа төрүүлээд жин минь сүртэй хасагдаагүй гэх мэтээр хөвсгөрөөсөө салж чадахгүй л байна. Хичээнэ ээ, би. Энэ үгийг хэд ч өөртөө болон гэрийнхэндээ хэлж байгаа юм бүү мэд. Тоогоо алдсан. Ккк. 

Ямартай ч орлоо гэж бодоод, сэтгэл бага ч атугай өөдрөг байна. Хи хи. Пиджак минь жаахан бариастай, гараа жаахан эвгүй өргөвөл л урагдчихаж магадгүй байсан тул, нэг их хөдөлсөнгүй. Хо хо. 

Ямартай ч ойрын хугацаанд жингээ хасах минь гэж тас түс шийдэв. Хэ хэ. 

Юу ярьж явлаа? Аан тийм төгсөлт. За тэгээд бага, дунд сургуулийн төгсөлтийн арга хэмжээтэй төстэй. Байнгын уншигчид бол мэднэ дээ. 

Арай хийж дурсамж хичээл нь дуусаад гарч ирэхэд нь сургуулийнх нь үүдэнд хамтдаа зургаа татуулав. Өлсөөд гэхээр нь урд нь ордог байсан пастаныхаа газар орж хооллов. 

Үдээс хойш ангийнхаа ганц нэг найзтайгаа хамт зугаална гээд хүргүүлсэн. 

Манайх шиг хонхны баяр, зугаалга гэж хонууд өнжүүд явахгүй. Архидахгүй. Хэ хэ. Багш нартаа бэлэг өгөхгүй. Сургуульдаа харин дурсгалын зүйл бэлэглэсэн. Өмнөх жилийн төгсөлтийнхөнтэйгөө нийлсэн гэсэн. 

Нэлээд үнэтэй зүйл байсан болохоор тэгсэн байх гэж бодсон. Тайзны хөшиг юм болов уу гэж ойлгосон. Тусгай хэллэгтэй юм билээ? Миний мэдэхгүй үг гарсан. Зулзагаасаа асууж, мэдэж авна аа. 

За нэг иймэрхүү. Түр баяртай. Бүгдэд нь амжилт хүсье.