Алхаад л

Гүйхгүй алхахаар шийдсэн. Хэ хэ. 

Хаврын амралт, шинэ сургууль, шинэ хамт олон, шинэ багш, шинэ хувцас, шинэ цүнх, шинэ орчин...

Өөр юу билээ? Хичээлийн шинэ жил эхлэхээр их л догдолдог байсан даа. 

Шилжилт хөдөлгөөн өрнөөд сонингоор нэг шилжсэн хүмүүсийн нэр. Ажлынхан их ач холбогдол өгч, хараад байсан. Би ч нэг их тоосонгүй. Ярьшиг, хайран цаг, хайран нүд. Их жижигхэн бичээстэй байсан тул залхуу хүрсэн. 

Зулзагын анги дааж төгсгөсөн багш нь бас шилжиж байна гэнэ. Нэг өдөр очиж уулзаад байх шиг байсан. 

Цэцэрлэгт бас холио солио хийнэ. Шинэ багшдаа дасах гэж хэд хоног "гүрийх" байх даа. Одооны өнөөх ядардаггүй Чихиро багшдаа ээжийн дараагаар хайртай хүн шүү дээ. 

Ядрахаа мэддэггүй залуухан багш. Ганц бие байх гэж тааж байгаа, ямар асуух биш. Энд ер нь хүний хувийн асуудал огтоос падгүй ч юм шиг...

Саяхан энд дадлагаар ирсэн хоёр монгол мэргэжилтэн бас гайхаад л байсан, эдний энэ шилжилт хөдөлгөөнийг. Авилгалд идэгдчихсэн манайд нэг хэрэгжүүлж үзмээр ч юм шиг тийм ээ. 

Ядаж л шинэ орчинд очихоор улам ихийг суръя, улам их хичээе гэж боддог доо. Гэхдээ нэг залуу нь "өөрийгөө их голлоо" гэж хэлж байсан. Туршлага солилцох гэж ирээд, жаахан ч гэсэн өөрчлөлт мэдрээд буцаж байвал сайн тийм ээ? 

Сакүрадаж амжсан, хальт. Зураг оруулна аа. Гэхдээ нэг л газрын зургийг олон жил оруулж байгаа болохоор. Хэ хэ. Зулзагууд томроод зураг хөрөг даруулахаасаа цааргалаад байх болж. Ялангуяа энэ эгч гуай. Нэг л их сэлбэлзсэн охин. Уур хүрээд хааяадаа загначихаад байгаа. 

Учиргүй загнахгүй, үглэхгүй гэж уншаад байгаа хэдий ч тэсэхгүй байна. Хэ хэ. Өнөөх шилжилтийн нас гээч нь бололтой дог шүү. Түүгээрээ түрий бариад, бүр миний шилжилтийн нас юм чинь гээд пээдийгээд байдаг шүү...

Ээж одоо аях вэ? Ээжийн хатан ухаан хэрэгтэй юу? Эсвэл еврей ээжийн ухаан хэрэгтэй юу? Нэг л аргаа олохгүй байна шүү. Нэг айлын хүүхдүүд бүгд өөр өөр ааш араншинтай гээч нь болж байх шиг...

Дунд сургууль орж тамирын хувцас гэх мэт зүйлсээ худалдаж авлаа. Цаанаасаа бүгд ижилсэнэ. Амар. Цүнх нь харин 4 газрын сонголттой юм билээ. Үнэтэй гэж, яахав 3 жил барих тул хямд ч юм уу? 

Гутал, тамирын хувцсан дээр нэрийг нь оёчихдог. Бүгд нэг ижил хувцас өмсөхөөр хольж солиод хэцүү байх даа тийм ээ. Түүнээс л урьдчилан сэргийлж байгаа байх...

Ажил дээр бас ганц нэг хүн солигдоно, ааш зан дажгүй хүмүүс байгаасай...

Хүмүүсийн ааш зан яахав ээ? Тийм ээ? Миний өөрийн ааш ойрд жаахан ойлгомжгүй байгаа. Уурлах гээд, заримдаа уйлах гээд нэг тийм сонин. Нэг удаа бүр уйлаад амжсан шүү... Хаварт буруугаа өгөх үү?

Өө тийм, санаандгүй блогийнхоо гүүглийн статистек тоонуудыг нь олж хараад саяхан. Блог бичиж эхлээд бараг анх удаагаа, олж мэдэж харав гэхгүй юу. Хэ хэ. 

Дэлхийн өнцөг булангийн хаанаас хэдэн хүн орж ирж уншсаныг нь харж болдог юм байна тийм үү? Ихээр орж ирж уншдаг нь япон дахь хүмүүс байсан. Тэгээд монгол. 

За тэгээд америк, герман, солонгос, англи, австрали, орос гээд л. Гоё мэдрэмж байсан. Хи хи. Хөөх, бүр сонин газраас орж уншсан байх нь гэх тохиолдол ч байсан. Мартчихаж. 

Илүү хэрэгтэй сэдвээр бичмээр ч юм шиг санагдсан шүү. Хо хо. Ямартай ч цаг заваа зориулан орж гардагт маш их баярлалаа. 

Учиргүй хэрэгтэй сэвдээр бичиж амжихгүй ч идэвхитэй бичихийг хичээнэ ээ. 

Түр баяртай, бүгдэд нь амжилт, хайр, мөнгийг хүсье.

Өчигдөр

За "Өчигдөр" номоо уншлаа. Хорхойсож хорхойсож, монголоосоо авсан өдрөөс л цүнхэлж явсан. 

Аяа хорвоо, бас л зоригтой өвөрмөц бичих юм аа. Бичжээ. Өмнөх гурван ном ч бас нэг тийм таамаг, нэг тийм зэвүүн, нэг тийм харгис, нэг тийм хурц, нэг тийм хэрцгий, нэг тийм өрөвдмөөр...

4 сард бидний хэдэн бүсгүйчүүд Агота Кристофын 5 номын тухай ярилцана. Хэдэн жилийн өмнө уншсан "зэвүүн" гурван цувралаа нэг гаргаж ирж гялс уншина аа. 

Өнөөдрийн өндөрлөгөөс арай өөрөөр уншигдах байх...

Өөрийнх нь хэлснээр эх хэлээрээ бичсэн бол энэ байтугай зохиол бичих байсан байх. Гэхдээ бас өөрөө дүрвэж, хэцүү ширүүн зүйл амсаагүй бол ийм зэвүүн зохиол төрж гарах байсан болов уу ч гэж бодох...

Зохиолынх нь баатрууд бага насандаа их хэцүүг туулсан байх юм. Дайн, өлөн зэлмүүн амьдрал, түүний хор хөнөөлийг амсах жаалууд, багачууд, эмэгтэйчүүд...

Эмэгтэйчүүдийн үзэсгэлэнт төгөлдөр дүр гарахгүй, хүүхдүүдийн дүр цаанаасаа нэг тийм зэвүүн, хэрсүү, наснаасаа эрт насанд хүрчихсэн дүр, эрчүүд нь нэг тийм хийцгүйрсэн дүрүүд ихтэй.  

Номын төгсгөлд хоёр монгол залуугийн харилцан захидал харин их сонирхолтой санагдсан. Хүүе энэ хүмүүс чинь ямар сүрхий задлан шинжилж уншдаг юм бэ? гэж бишрэв. 

Миний бие одооноос л ингэж бодож, тунгааж уншдаг болох гээд үзэж тарж л байна. Гэхдээ би өөрөө яриандаа жаахан тааруу, сайн бэлдэж, сайн задалж чадаагүй гэсэн үг. 

Гол нь ярих зүйлээ маш сайн бичиж тэмдэглэж завдахгүй байгаа юм. Бусад бүсгүйчүүдийнхээ ярихыг сонсоод бас л "хөөх" гэж сонсон суудаг. 

"Бичиг үсэггүй хүн" номыг нь би их таалсан юм. Орчуулагч нь яагаав, шунал хөдөлгөгч маань. Бас л өвөрмөц зохиолыг айлгүй барьж аваад орчуулчихдаг их эд ээ. Би бол ийм зохиолыг манайхан яавч таалж уншихгүй гээд орчуулахгүй ээ. Хэ хэ.

Тэгэхээр зохиолчоосоо ч илүү зоригтой юу, айн?...

За тэгээд орчуулагдаж хэвлэгдээд удаагүй номыг үтэр түргэн олж уншсан өөрийгөө урамшуулаад, түр баяртай. 

Бүгдэд нь амжилт, хайр, мөнгө хүсье. 

Гүйгээд л 4

За энэ хагас бүтэн сайнгүй ажиллах ч цаанаасаа нэг ядардаг юм байна шүү. 3 сар л гүрийчихвэл гэж бодож байсан чинь, 4 сарын эхний хэдэн өдөр ажиллах болчихсон. 

Мөнгөнд хайртай, тэрбумтан болох гэж байгаа хүн чинь гар хөлөө зэрэг өргөөд л ажиллая аа гэчихсэн. Гайгүй байгаа, хавар цагийг ч хэлэх үү? Сунаад өгөх вий? Блогийн бичвэрийн зай холдоод унах вий... Хи хи. 

Мэдээж өдөр бүр ажиллахгүй ээ, ажлын өдөр дунд нь заавал нэг өдөр амарч байгаа. Хуулиндаа тийм заалттай гэсэн шүү. 

Гол нь би тэр өдрөө бүтэн амарч чадаж байна уу? гэхээр асуудалтай. Төгсөлт, худалдаа, гэр орны ажил...

Мөн өнөөхийн чинь хаврын синдром эхлээд дараагийн номнуудаа худалдаж авах уу? Болих уу? Мөнгөө цуглуулах уу? Яах уу? гэж өдрийн бодол шөнийн зүүд. 

Учир нь нэг таньдаг хүн монгол яваад ирэх гэж байгаа юм аа. Суугуул мужийн нэгэн хотын хүн. Алтан боломжийг алдаж боломгүй санагдаад. Цөөн хэдэн ч болтугай ном нааш нь дайчих юмсан гэж бодогдоод. 

Интерномын онлайн худалдааны сагсандаа 10-д ном хийчихсэн байвал яах уу? Энэ яг хаврын синдром байгаа биз дээ? Орчуулгын номнуудыг нь хасаад хасаад тэр шүү дээ. 

Ганц нэг л орчуулгын ном үлдээсэн. Бусад орчуулгын номыг эндээс япон хэлээр уншчих санаатай, хэл ус сайтай хүн чинь. Ха ха. 

Бага зулзага харин жаахан эрхлээд байна. Өмнө нь хөөрхөн үлдчихдэг байсан хүн чинь одоо учиргүй дагаж маяглаад. Усан нүдлээд...

Уг нь одоо нэг нас нэмчихсэн, 4 сараас анги дэвшинэ гээд томроод л байх шиг байх юм. Хань ижлийн хэлдгээр ээж эрхлүүлээд, ийм болгоод байна гэдэг нь л болж байх шиг. 

Хүүе, ажил ажил гэж гүйж байгаад хаврын ганц дурсгал болох "сакүра"-дахаа мартах гэж байна. Эгч сануулаад л байсан, "такояки （octopus dumplings）идмээр байна гэж. Сакүра чухал биш, идэх юм л чухал байх шиг...

Хаврын амралт эхэлчихсэн. Эхэлчихсэн ч гэж дээ, бага сургуулиа төгсчихсөн хүн чинь сургуулиас өгсөн гэрийн даалгаврыг хийсэн шиг. Дундуур нь баахан ном уншаастай. 

Үе үе үглүүлж байж гэрийн ажилд туслана. Дүүгээ элдэвлэж өднө, уйлуулна, хэрэлдэнэ. О.зулзага таг чиг байна, ойрд. Таг чиг байвал сайны шинж гэдэг юм билээ. Би ч гүрийж байгаа. Ха ха. 

Сакүрадах гэсэн хань ижил эзгүй. Ер нь жилээс жилд нэг тийм эзгүй байж таардаг. Ажил ихтэй, бүр олон хоногийн өмнөөс хошуугаа цорвойлгож байж хааяа нэг шөнийн сакүра харж баясдаг л юм. 

Гэснээс хань ижил эзгүй байх бас л эвгүй юм. Дээр үед нэг савангийн дууриас сонссон үг ер нь үнэн юм. "Эрэгтэй хүн бэлэгдлийн чанартай ч хамаагүй, гэрт байх хэрэгтэй юм" гэж. Ха ха. 

Арай хэтрүүлчихсэн үү. Хо хо. Ер нь энэ японд эр нөхөр, аав гэдэг хүмүүс жаахан нэр хүнд муутай, ээжүүд бол баздаг нь их юм шиг байна лээ. Мэдээж бүгд биш шүү...

"Эр нөхөр чинь эзгүй бол гэрийн чинь зай эзгүйрнэ" гэж юутай үнэн үг вэ. Бага зулзага л уйдаж байх шиг байна. Утсаар ярихаараа "Яагаад харьж ирэхгүй байгаа юм?" гэж асуудаг. Эгдүүтэй.

Өө тийм, удахгүй баахан татварын бичиг ирнэ. Төлдөг л байх даа, одоо. Мөн дунд сургуулийн бэлтгэл гээд ажил их байна аа. Цэцэрлэг нэг их сүртэй зүйл бэлдэхгүй байх.

Шинээр худалдаж авах юм байхгүй. Амар. Эцэг эхэд санхүүгийн дарамт харьцангуй бага байдагт нь баярлана өө. Эндхийн боловсролын салбарын нэг сайхан нь илүү дутуу зардал мөнгө нэхээд байхгүй...

За түр баяртай. Бүгдэд нь амжилт, хайрыг хүсье.

Жаргалтай болох зориг

Өнгөрсөн зун бэлгэнд авсан номын минь нэг. Уншиж амжихгүй явсаар, бага багаар нь, биш ээ нэг нэгээр нь уншиж л байна. "Өчигдөр" ном урдуур оочер дайрах гээд цүнхэнд яваад байна. 

Би ч овоо гүрийж байна. Хэ хэ. Эхэлчихснээр нь энэ номоо дуусгачих санаатай зүтгээд байна. Хажуугаар нь тэрбумтан болох тухай номоо уншаастай. Энэ тухай бичих эсэхээ шийдээгүй, зөвхөн өөртөө үлдээх үү, хуваалцах уу? Хо хо. 

Аяа бас л Адлер гэж айхтар хүн байжээ. Эхэндээ залуугийн талд орж уншина. Номын төгсгөлд Адлерийн талд яваад орчихно. Хэ хэ. 

"Ад үзэгдэх зориг" номноос бас л овоо хэдэн зүйл мэдэж авч байсан. Миний талаар хүмүүс юу гэж бодох нь миний асуудал биш. Тэдний л асуудал. Энэ их аятайхан санагдсан. Хэ хэ. 

Цахим ертөнцдөө идэвхитэй, элдэв зүйл бурж байдаг болохоор хааяа санаа зовдог байснаа, одоо бол би өөрөө л хүсэн, бичиж, оруулж байгаа тул хэнд хамаа байна гэж бодож энэ тэр. Ха ха. 

Гэхдээ байна шүү, эдгээр номнуудыг их ойрхон байлгаж, үе үе сөхөж харж байх зүгээр. Би одоохондоо тэгж амжихгүй л байна. Зулзагууд жаахан томроод гараас гарахаар өөрийн дуртай зүйлдээ цаг нарыг харамгүй зарцуулдаг болох байгаа...

Агуулгыг нь бичих илүүц биз ээ? Хамгийн сонирхолтой нь "Буруу үйлдлийг хийж буй цаад зорилгыг 5 үе шатанд хувааж үздэг нь. 

Уншиж байхдаа зулзагуудынхаа үйлдэж байсан, үйлддэг "буруу үйлдлийг" бодож үзэв. Хэт гүнзгийрэхээс нь өмнө л шийдэж байхгүй бол гэж бодогдов. 

1 дэх үе шат: Магтаал хүсэх.

2 дахь үе шат: Анхааралд өртөхийг хүсэх.

3 дахь үе шат: Эрх мэдлийн тулаан.

4 дэх үе шат: Өшөө авалт. 

5 дахь үе шат: Чадваргүйгээ батлахаар зүтгэх. 

3 дахь үе шатнаас дээшээ нэлээд хүнд тал руугаа гэж байна. Мэдээж номонд шат тус бүрийг дэлгэрэнгүй бичсэн. Сонирхвол олж уншина биз ээ. 

Мөн "итгэлцүүр", "итгэл" хоёрын тухай тайлбарлан таниулсан байна лээ. Ай хорвоо гэж, уншаад үзэхээр биелүүлж болмоор ч юм шиг, бодит амьдралд бол залуугийн хэлдгээр бүтэшгүй мэт...

"Итгэх, хайрлахыг өөрөөсөө эхэл, хүнээс бүү хүлээ" гэсэн ерөнхий санаа явна. Чи эхлүүлэхгүй бол хэзээ ч биелэхгүй, цаад хүн чинь чамд итгэхгүй, хайрлахгүй байж болно. Чи л нөхцөлгүйгээр итгэ, хайрла...

Айдас халддаг, зориг халддаг. Хүндлэл ч бас бусдад халддаг.

Чадах болов уу, би? 

Философийн тухай уншсан чинь 10 жилийн нийгмийн хичээл л санагдаад. Нэг тийм хатуу багш эмэгтэй багш ордог байж билээ. Түүхийн хичээлийг мөн заадаг байсан.

Тухайн үед их сургуулийн конкурсны шалгалтанд нийгмийн шалгалтандаа хамгийн өндөр оноо авч билээ. Тухайн багшийн нөлөө их байсан байх гэж талархдаг.

Гэснээс энэ номны япон эх нь байгаа, номын тавиурт минь өрөөстэй. Ажлын газрын хүүхэн, эхний ботийн хамт бэлэглэсэн. Бэлэглэсэн ч гэж дээ, би монголоор авахад цаг хугацаа шаардагдах гээд байсан тул зээлж авч уншаад, удаасан. 

Тэгсэн за за бэлэглэе" гэсэн. Алгаа ташаад л, алгаа тосоод л авчихсан.

 Харьцуулж унших гэдэг "үлгэр"-ээ ирээдүйд хэрэгжүүлнэ дээ. Бодож явахад бүтэх байгаа.  

Нэг хэсэг япон эх хувиуд нь ширээн дээр хөглөрөхөд зулзага олж харсан бололтой, саяхан 

-Ээж, манайд Ад үзэгдэх зориг байсан тийм ээ? 

-Тийм, байгаа. 

-Зээлж авлаа шүү...

Дуустал нь уншаагүй байх, арай ахадсан байх. Ганц хоёр жилийн дараа дахин сөхөн харах биз? Хамгийн чухал нь Адлер гэдэг нэр тогтоож авсан байсан. Саяхан бас нэрийг нь яриан дундаа хэлж байсан...

Ингээд л уншаад байх тусам унших юмсан гэсэн ном их гарч ирэх юм. Та нарт бас тэгж байна уу? Саяхан монголоос ирсэн 8 номоо, оны эхээр авсан 7 номоо гээд л уншмаар байх юм. Хэ хэ. 

Тэгсэн би амжихгүй, гүйгээд л байгаа хэрнээ...

"Би-гээр ангиржснаар бие даана" гэж байна шүү. Мөн "бие даах бол "хувиа хичээхээс ангижрах" явдал юм". 

Ингээд л үг бүрчлэн анхаарал хандуулж уншвал аяа бас л "Цаг үеэсээ 100 жилээр түрүүлэн алхсан гүн сэтгэгч Алфред Адлер" гэдэг үгийг ойлгох шиг л болно. 

За тэгээд нэг нэг алхмаар урагшилж өөрсдийн замналаа бүтээцгээе.

Түр баяртай, бүгдэд нь амжилт, хайрыг хүсье. 

Саятны сэтгэлгээний нууц

Номын клубынхан маань энэ номыг 2 сард уншсан юм. Би монгол хэлээр нь олж авах боломжгүй байсан тул япон хэлээр нь захиж унших гээд номын сандаа захиалсан чинь хүн зээлчихээд буцааж өгдөггүй. 

Уулзалт болоод өнгөрчихсөн хойно захиалсан  ном чинь бэлэн боллоо, ирж аваарай гээд. 

Зээлчихээд бас уншиж төвдөлгүй цүнхэлж нэлээд явав. Аминдаа зээлсэн дарааллаар нь уншчих санаатай. 

Бас иймэрхүү номыг чинь төвлөрч уншаад, хэрэгтэй гэсэн зүйлсээ бичиж тэмдэглэмээр байдаг тийм ээ? 

За тэгээд "саятны" гэдэг үгийг нь "тэрбумтны" болгож өөрчилж уншиж байгаа. Хэ хэ. 1 сая төгрөгийг бол цуглуулчихаж болж байна. Сүүлийн үед монгол дахь орлогоо шууд ном болгочихоод байгаа болохоос биш, цуглуусан бол сая төгрөг элбэг хүрэх байсан л даа. Хо хо. 

Монголдоо бас орлоготой гэж байгаа, сэргэлээн хүүхэн чинь. Нууц шүү гэхдээ. Юу юм бол гээд ургуулж бодоод, хор шараа хөдөлгөөд байв аа? Ха ха. Ээж аав, дүү нараасаа тийм ч зулзагын төрсөн өдөр, ийм ч хүүхдийн баяр гээд мөнгө нэхчихдэг юм аа. Хи хи. 

Чихэр хэрэггүй ээ, ном ном гээд зулзагуудынхаа төрсөн өдрөөр өөртөө бэлэг авчихдаг юм аа. Яахав оронд нь би энд иенээр нь бодоод зээ нарт нь өгчихдөг л дөө. 

Цэвэр орлого биш болоод явчихлаа тийм үү? Тийм болохоор л цэвэр орлоготой болмоор санагдаад, энэ номыг уншихаар шийдэв. Одоохондоо оршил хэсэгт л явж байна. 

Яваандаа намайг, таныг тэрбумтан болгох ёнк гэсэн санаанууд гарч ирэх байх. Гэхдээ байна шдээ. Нэг асуудал байна. Тэр нь юу вэ гэхээр?

Монголчууд бидний нэг сул, муу тал нь тиймэрхүү мэдээллээ бусаддаа хуваалцахдаа муу тул би ч гэсэн эндээ бичихгүй байж магад шүү. Гэнэт таг чиг болоод л. Хэ хэ.

Эргэн тойронд зөндөө тийм жишээ сонсож байсан тул. Ялангуяа бизнесийхэн. Мөн гэнэт жаахан мөнгөжихөөрөө таг чиг болчихдог, булаагаад авчихна гэж боддог юм болов уу? Ха ха.  

Надаас түрүүлээд та нар баяжчихна шүү дээ. Би гол санааг нь өгсөн атал. Надад ерөөсөө хувь мувь, баярлалаа маярлалаа ч байхгүй таг чиг байна гэдгийг чинь ч мэдэж байна. Хо хо. 

За тэгээд хошигнол гэдгийг бас ойлгож байгаа биз дээ? Шууд түс тас итгэчихэв ээ...

Бас л эртний ном байна. 2012 онд орчуулагдсан байх юм, монгол хэлэнд. Япон хэлнээ хаа байсан 2005 онд анхны хэвлэл, 2011 онд 11 дахь хэвлэл гэнэ шүү. Базарваань хум пад. Ийм алдартай номны хаагуур ч явж байсан юм бүү мэд. 

2005 он гэхээр ирээд 1 жил гаран болчихсон, овоо баруун зүүнээ мэддэг болчихсон. Харин хэл ус бол түүхийгээрээ байжээ. 

2011 онд дунд зулзагаа төрүүлээд нялх биетэй ээж юун ном зом, ээжийн ажил ид дундаа явжээ. Нэг ахиулсан юм нь блогоо бичиж эхлээд даруй 5 дахь жилдээ явж байж...

Дивангаравын ном болохоор агуулгыг нь нуршихгүй ээ. Өөрт хэрэг болж магад гэснээ л түүж бичнэ ээ. 

За тэгээд мөнгөний тухай ярихаар би нь жаахан "харамч" шүү. Хэмнэлт яриад явчихдаг шүү. Дэмий юманд мөнгөө үрлээ гэж харамсах тохиолдол бий. 

Энд ирснийхээ дараа баруун солгойгүй "цацсан". Зээлдүүлээч гэхээр нь зээлдүүлээд л, ижий аавдаа унах унаа авч өгөөд л. Тэнд ч хүн өвдлөө, ажил явдал гарлаа гэхээр нь хүн чанар зулгаагаад өгдөг.

Яахав сэтгэлээрээ өгсөн болохоор харамсдаггүй л дээ. Харин зугаа цэнгэлд жаахан хойрго. Хурим, найр гэх мэтэд хол байгаагаараа далимдуулна өө. Хэ хэ. Сүүлийн үед бүхий л баярыг нүсэр тэмдэглээд байхаар нь улам бухимдаад байдаг болсон. 

Баярлахдаа айхтар чинээлэг улсууд байдаг юм аа. Өвдөхөөрөө мөнгөгүй болчихдог юм аа. Тэгээд эргэж тойр гээд байдаг юм аа. 

Гэхдээ ёстой луувангаа иднэ үү? Лаагаа иднэ үү? Ямар хамаа байна аа гэж бодож сурч байгаа. Би л өөрийгөө хичээх минь тийм ээ? 

Мөн сүүлийн хэдэн жил харин ам бүл нэмээд, зулзагууд томроод хэрэглээ нь ихсээд ирэхээр өгье гээд ч сачий хүрэхээ больдог юм байна. Эсрэгээрээ би өөрөө тэр зээлдүүлж байсан хүмүүсээсээ, өвдөхөд нь тусалж байсан хүмүүсээсээ авмаар ч юм шиг санагдах үе гарна. 

Нэхэхгүй л дээ. Заримдаа үнэхээр шантрах үе гардаг даа, амьдралд чинь...

Ямартай ч тэрбумтан болмоор байна өө. Тэгвэл өгөхөө байг гэхэд авчихалгүйхэн шиг өөрсдийгөө болгоод баймаар байна өө. Хэ хэ. 

Тийм учраас энэ номыг клубынхаа гишүүдээс хоцорсон ч нөхөж уншмаар санагдсан юм. Баяжихыг хүн болгон л хүсдэг тийм үү? Би мөнгөнд хайртай...

Түр баяртай, бүгдэд нь амжилт, хайр, мөнгө бүгдийг хүсье. 

Гүйгээд л 3

Өнгөрдөг 7 хоногт болсон зүйлсээ базаад бичив. 

Зулзагуудын төрсөн өдрүүд болов. Эгчийн төрсөн өдрөөр бүр бялуу ч аваагүй. Угаасаа бялуу идэх хүсэл төрөөгүй тэр өдөр. Идэх хүсэл ч гэж дээ өөрсдөө бялуу авах хүсэл төрөөгүй. Өөрсдөө ч гэж дээ, ээжид тийм хүсэл төрсөнгүй. 

Бэлэг гэж мөнгө өгсөн. Өөрөө дуртай юм аа авах биз. Гэхдээ хадгалуулна гэсэн. Ээжээс баян болсон байна лээ шүү. Саяхан нэг тоолсон чинь. Хэ хэ. Үрж болохгүй шүү, гар хүрч болохгүй шүү гэсэн. 

Ээж гэхдээ нууцаар зээлдэг хааяа. Бэлэн мөнгөгүй үед хэрэг болох үе бий. Сэмээрхэн буцаагаад л хийчихдэг. 

Гэснээс томроод мөнгө нь дээр гэж хэлдэг болсон байна лээ. Хааяа нэг дэлгүүр хоршоо орохдоо багаханыг авч яваад ганц нэг юм авч харагддаг. 

Одоо ч дүрэмт хувцастай болоод ирэхээр энгийн хувцас ч нэг их шаардахгүй амар. 

Бага зулзагын төрсөн өдрөөр бялуу авсан чинь эзэн өөрөө огт идээгүй. Ирэх жил өөрт нь л жижигхээн бялуу авна аа. Бэлэг л их чухал байсан манай хүнд. Сэтгэл ханамж 200 хувь байсан. 

Төгсөлт болов. О.зулзагын төгсөлтдөө өмссөн хувцас байсан. Ашгүй. Яг л таарч байна лээ. Харин гутал нь багадаад, гэхдээ ганцхан удаа өмсөх юм чинь гээд өмсчихсөн. Ха ха. 

Ангийн самбараа ингэж чимдэгийг уншигчид минь мэдэж байгаа тийм ээ. Ахлах, дунд сургууль ч адил. Бусад үед бол хуваарь, бас бус хэрэгтэй зүйл хадаастай байдаг.

Угаасаа сургууль дээрээ очоод тайлчихдаг юм. Ээж гэж үнэн танхай байна уу? Одоо тэр гутлыг хаяна аа. Угаасаа ч жаахан муудсан байсан. Тэгээд ч одоо дүүд хадгална гэхгүй. 

Энд халуунд гутлын доторх арьс нь үйрээд уначихдаг юм билээ. Сонин. Эсвэл би арчилж чадахгүй байж магад. 

Энэ зурган дээрх цэцгэн артан доогуур төгсөх сурагчид, багш нар алхдаг. 5 дугаар ангийнхан бариад зогсдог. Ингэхдээ зүгээр энгийн хувцастай л зогсоно. 

Ирэх сард элсэлт болно доо. Дүрэмт хувцас авахгүй ч, тамирын хувцас гэх мэт зүйлс шинээр авна. Шинэчилэгдсэн байсан. Өмнөх хувцсыг нь монгол явуулна аа. Нэр усыг нь оёчихсон л байдаг юм. Яая гэхэв. 

Монголоос ирсэн 2 хүнтэй танилцсан. Яагаав номоо дайж авчруулсан. Дахин хүн ирэхээр бол хэлнэ ээ, номоо дайгаарай гэсэн. Ганц нэг ном авах гээд сагсандаа хийчихсэн байгаа. Хурдхан аваад бэлдчихнэ ээ. 

Хэзээ ч хамаагүй утасдахад нь бэлэн байхаар. Хэ хэ. Нэг орой нь хамт шар айраг ууж нутгийн сонин сайхан, эндхийн сонин сайхнаас хууч хөөрөв. Ганц нэг хүмүүст боргол дайж явуулав. Хи хи. 

Хүмүүст төвөг удаж ханахгүй л хүн байна дөө би ч. Хэзээ нэгэн цагт миний тус болбол хэлээрэй, манайхаан. 

Хагас бүтэн сайнд ажиллаад, ажлын ганц нэг өдөр амралт аваад сургууль цэцэрлэгийн элдэв арга хэмжээнд явж байна. 3 сар бүтэн тэгж ажиллахаар байсан чинь 4 сарын эхний 2 долоо хоног бас хагас бүтэн сайнд ажиллахаар болчихлоо. 

Угаасаа 4 сард элсэлтийн арга хэмжээгээр нэг өдөр амрах болчихоод. 5 сараас нэг жигдрэх байгаа. 

За өнгө алагласан цэцгээр төгсгөнө өө. Төгсөлт, элсэлтийн арга хэмжээг цэцэггүйгээр төсөөлшгүй. 

Би ч зургийг нь сайн дарна. Хэ хэ. 

Түр баяртай, бүгдэд нь амжилт, хайрыг хүсье.

2023 оны эхний 8

Шинэ он гарсаар монголд худалдаж авсан эхний 8 ном. Энэ удаад "Интерном" номын дэлгүүрээс өөрөө онлайнаар захиалав. Нэг гэм нь гадаадаас авахад баркод гээчийг нь уншуулж болохгүй дүүгээ гуйв. 

Дараа нь дүүгийнхээ дансанд ээжээрээ мөнгийг нь шилжүүлж хийв. Гээд ер нь л гадаадаас бид ном худалдаж авах гэж бөөн хүн, хүч зарах юм өө. 

Тэр болгонд минь цааргалалгүй хөдөлж өгдөг бүх хүмүүстээ баярлалаа. Үргэлж л баярладаг шүү. Буянаа нэм, буянаа нэм. 

Ямартай ч наашаа ирэх хүмүүсийг эрж хайж, араас нь хөөцөлдөж явсаар 8 ширхэг номоо гартаа оруулаад авсан шүү дээ. Сэргэлээн хүүхэн шүү. Хи хи. 

Хамгийн сүүлд орчуулагдаж гарсан шинэхэн ном болох "Өчигдөр" номыг хүртэл гартаа оруулчихсан гэж байгаа. Айхтар хүүхэн шүү. Хэ хэ. 

Энэ удаагийн номнуудаас 6 ширхэг нь эрүүл мэндтэй холбоотой. "Өлөн байх нь хамгийн хүчтэй эм" гэдэг номны монгол орчуулга болох "Мацаг" номыг хүртэл авчихлаа. Ойлгохгүй байсан хэсгээ монголоор нь уншина даа. 

Мөн уншина даа гээд худалдаад авчихсан цусны эргэлтийн тухай нэг япон номыг барьж авалгүй явсаар монгол орчуулгыг нь авчихлаа. Бараг мөн байсан байхаа, өөр ч ном байж магад. 

Бас бясалгалын номны япон эх хувийг нь ололгүй монголоос захьчихлаа. 

Яваандаа бясалгал сонирхож эхлэе гэж бодоод байгаа юм.  

Ядаргаатай их ном захиад байгаагаа мэдээд байгаа шүү. Миний өмнөөс битгий бухимдаарай, мөн битгий атаархаарай, харин үлгэр жишээ аваарай. Жилд 400 ном уншдаг хүний хажууд бол ногооноороо шүү. Хи хи. 

Интерномын онлайн худалдааны сагсандаа бас нэлээд хэдэн ном хадгалчихсан байсан. Ха ха. Орчуулгын номыг нь аминдаа хасаад байгаа, эндээс япон хэлээр олоод уншчих санаатай. Хэлтэй байх чинь бас их зүгээр юм. Ооё...

За уншаад явахаараа зураг хөрөг оруулаад явна аа. 

Бүгдэд нь хайр, амжилт хүсье, түр баяртай.

Жич: Монгол чёко, Ялгууны бэлэгтэй болсон. Чёкогоо охиндоо төрсөн өдрийн бэлэг гээд өгчихсөн. Ялгууныхаа бэлгийг задлаагүй байгаа, яг юу болохыг нь мэдсэнгүй...

Гүйгээд л 2

"Гүйгээд л" бичвэрийн үргэлжлэл шүү. 

Эмнэлэг орохдоо зулзагаа гутлыг нь өмсүүлэлгүй тэвэрч машинд суулгаад, тэврээд буугаад байсан юм. Харьж ирээд гутлыг нь бусад цүнх энэ тэртэйгээ хамт оруулна даа гээд хойд талаас нь аваад доорх зураг шиг машин дээрээ тавьлаа. 

Урдах суудал дээрх цүнх энэ тэрээ аваад машинаа түгжээд орлоо. 

Маргааш нь буюу бүтэн сайны өглөө би ажилтай, өдөр хоёр зулзагаа пианика хөгжмийн концертонд хүргэж өгөхөөр тохироод, баахан үүрэг даалгавар өгөөд ажилдаа явлаа. 

Байшингууд дундаа хурд багатай явж давхиж байсан чинь алхаж явсан эмээ өвөө хоёр над руу хараад л байна. Булан тойрсон ч хараад л байлаа. Би хальт толгой дохил өнгөрөв. 

Ажлаа хийгээд сууж байсан тэр эмээ өвөө хоёр л бодогдоод болдоггүй ээ. Масктай болохоор нь би таньсангүй юу? Хэрэв таньдаг бол мэнд мэдээгүй ёс алдлаа даа гээд л...

Цайны цаг ч болов. Гэр лүүгээ жирийлгэв. Зулзагууддаа аваад гарах боллоо. Багынхаа гутлыг хайгаад олдоггүй. Хааччихав аа болоод л дуу минь чангараад ирлээ. 

Тэгснээ гэнэт саналаа. Гарч машиныхаа оройг харлаа. Яаж байхав дээ, тийм ээ?  Зуны сандаал байсан тулдаа аминд орлоо. Өглөө явсан замаараа аажуухан давхилаа. 

Зүүн хойд хаалганы дээр тавьсан байсан тул зүүн тийш хараагаа бэлчээгээрэй гэж үүрэгдээд, өөрөө ч хальт бас хараад л явлаа. Байдаггүй. 

Ингээд нэг гэрлэн дохион дээр ирлээ. Бид зүүн эргэнэ. Өглөө ажилдаа явахдаа баруун эргэсэн юм. За энэ хүртэл алга, буцахдаа л амжвал тэр замаар явна даа гэж байтал дунд зулзага:

-Ээж ээ, нэг юм харагдлаа. Гэхдээ хэрээ ч байж магад шдээ. 

-Хэрээ нисээд явчихна биз дээ? Өнгө нь ямар байна? 

Хоёрыгоо буулгаж өгчихөөд буаад л давхилаа. Тэгсэн хөөрхөн ингээд торойгоод байж байдаг байгаа. 

Мэдээж унахдаа ингэж зэрэгцээд л унаагүй нь лавтай. Ард явсан машинь эсвэл өөр нэг машины жолооч буугаад л цуглуулж ингэж өрж тавьсан байх. Баярлалаа гэж хэлмээр байдаг. Хэ хэ. 

Ар хэсэг нь жаахан шамшийсан байсан. Бодвол арын машин унахад нь амжаагүй дайрсан байж магад. Тэр ч одоо дүүрч. 

Би өөрөө сайхан хэлбэрт нь оруулаад хэд хэд "илчихсэн". Буцаад хэвэндээ орчинхо лээ. Удахгүй багадхын хооронд бас шинээр гутал авч илүү зардал гаргамааргүй байсан. 

Ашгүй олоод санаа амарсан. Тэгээд л бодлоо. Монголд бол хүүхдийн гутал, оймс олох сайн гээд л аваад явчихсан байх даа гэж...

Яагаад л ойрдоо бид паян ихтэй байна аа, эх оронд минь Богд тодроод сүйд болж байна, ном зом уншуулах уу? гэж бодож байтал хонх дуугарч шуудан ирэв. Юу байсан гээч? 

"Айраг". Булганых. Шууд задлаад уув. Сэтгэл сэргээд л явчихсан. Айраг явуулсан дүүдээ болон ээж аавд нь баярлалаа. 

Хань ижил эзгүйд дээж энэ тэрийг өгнө гэсэн явдалгүй шууд л задлаад уучихсан. Хэ хэ. Тэртэй тэргүй хоёр байсны нэгнийх нь дээжээс л өгөхөд болно тийм үү? 

Түр баяртай. Бүгдэд нь амжилт, хайрыг хүсье. 

Алхимич

Өнгөрдөг зун бэлгэнд авсан ном минь. Номын клубынхаа унших ёстой номоо түрүүлээд уншчихсан хүн өрөөстэй хэдэн номоо эхнээс нь ууж байна. Яг л амттай боргол уудаг шиг ээ. Хи хи. 

Энэ удаагийнх нь "Алхимич". Нимгэхэнээс нь түүж уншиж байгаа юм. Хэд хэдэн япон ном бас цүнхэнд яваад байдаг. "Leverage хичээл хийх арга" номоо ч бас уншсаар, завсар зайгаар нь. Хичээл хийх аргын тухай бичнэ дээ. Түр хүлээнэ шүү та хэд минь. Хэ хэ. 

Хоньчин хүү Сантьего. Дэлхийгээр аялах мөрөөдөлтэй, хонио зарчихаад л аялана. Адал явдалтай ч таарна. 

Үзэл бодол нь ч өөрчлөгдөнө. Гол нь мөрөөдлөө, эрдэнэс олох зорилгодоо үнэнчээр цааш зүтгэнэ. 

Мэдээж дунд нь шантармаар, буцаж нутагтаа очоод хонио хариулмаар санагдана.

Ертөнцийн тухай, элсний тухай, хайрын тухай өөрийн гэсэн мэдлэгтэй, үзэлтэй болно.

Олдоц ховор ном гэж сонссон, тэгэхээр уншсан хүмүүс нэлээд байх. Агуулгыг нь эндээ нуршихгүй ээ. 

"Алхими, алхимич" гэдэг үгийг мэддэггүй байлаа. Нэг тийм "хими"-тэй холбоотой үг шиг санагдаад л явдаг байлаа. Ерөнхийдөө дүйж байна шүү. Хувиргах, хувиргагч гэсэн утгатай юм байн тийм үү? 

Хувиргалтын ухаан гэнэ ээ. Мөн япон хэлээр нь хайж үзсэн чинь 3 дахь утга нь "их хэмжээний мөнгө олдог хүн, дэлхий ертөнцийн үзэл бодлыг өөрчилсөн, асар аугаа үйл хэрэг хийх хүн, нэг бол тэр аргыг нь мэддэг хүн" гэж бичсэн байна.

Таалагдсан мөртөө бичлээ.

"...Угтаа одоо цагт л чандын чанд нууц оршин байдаг. Анзаарч ажиглавал энэ мөчийг сайн сайхан болгож өөрчлөх боломжтой. Өнөө цагаа өөр ээлтэй сайнаар өөрчилсөн байхад ирээдүй ч аятай таатай болж хувирна. Ирээдүйг март, өнөөдөртөө л орш. Өдөр бүхэн чинь хууль ёсонд заасан тэрл жамаар урсаг. Тэнгэр бурхан үр хүүхдүүдийг чинь асран тэтгэж байгаад эргэлзэлгүй итгэ. Өдөр бүр өнө мөнхийн хэлтэрхий гэдгийг бүү март".

"Зовлонгоос халшрах нь зовохоос илүү шаналгаатай".

Түр баяртай. Бүгдэд нь амжилт мөн хайр хүсье.

Leverage хичээл хийх арга 2

Үргэлжлүүлэх үү? Юун дээр зогслоо? Хичээл хийх аргын талаар юу ч бичээгүй байж тийм ээ? Хэ хэ. 

Энэ удаад олон долоон юм нуршилгүй шууд бичнэ ээ. За энэ номын дагуу хичээл хийгээд би энд ёстой "алж" байгаа гэж худлаа яриад ч яахав. Ямартай ч уншаад дууслаа. 

Ганц нэг санаж байгаагаа бичлээ. Товчлоод, базаад бичлээ шүү. Болгоогоорой...

"Үхтлээ ажиллахгүй байх. Аль болох хичээл хийх цаг гаргах. Орлогоо нэмэгдүүлмээр байвал ажиллахаасаа илүү хичээл хий, унш, судал".

Хичээл хийхдээ анхаарах 7 зүйл. 

1. Өөрийгөө тодорхойлох. Юу сурмаар байгаагаа тодорхойлох. 

2. Өөрийн зан ааш, онцлогт таарч буй эсэхийг мэдэх. 

3. Тогмтол үр өгөөжөө өгөх эсэх. 

4. Хичээл хийх дургүй ч мэдэхгүй байх нь ихээхэн алдагдалтай. 

5. Өмнө нь хүмүүс "хийж" байсан эсэх.

6. Төсөөлөл ба бодит байдлын ялгааг мэдэх.

7. Цаг үеээ олсон, цаг үетэйгээ нийцэж буй эсэх.

Уг номыг бичиж байх үеийн буюу 2007 оны байдлаар  хойшид хэрэгцээ ихсэх нь IT, гадаад хэл, мөнгө санхүү гэжээ. Үнэн байжээ тийм ээ? 

"Гэрийнхээ санхүүгийн тооцоог гаргаж мэддэггүй эр хүн өсөн дэвждэггүй" гэнэ шүү. Учир нь ирээдүйд захирал боллоо гэхэд зайлшгүй тулгарах мөнгөний тооцоо гэх мэтэд бүдрэх эрсдэлтэй.

"Хүүхдэдээ хичээлийг нь заах бус, хичээл хийх аргыг нь заах. Энэ нь насаараа идэх хөрөнгө өвлүүлж үлдээсэнтэй тэнцэх үнэ цэнэтэй".

"Сурсан мэдсэнээ гадагшуулж, хэрэгжүүлж, бусдад түгээхгүй бол өсөн дэвжихгүй". 

"Хичээл хийхдээ, уншихдаа норм тогтоох, хөтөлбөр гаргах. Мөн дуусгах хугацаа тогтоох. Цаашлаад бага ангийн сурагч шиг цагийн хуваарь гаргах".

"Анх эхлэх л хэцүү, нэг эхэлчихвэл харьцангуй гайгүй, өдөр бүр шүдээ угаадаг шиг дадал болгох".

"Аль болох өглөө хичээл хийх. Оройд нь давтах". 

"Сул цаг л гарах юм бол хичээл хийх. Жишээ нь гадаад хэл сурч байгаа бол шинэ үгсээ цээжлэхийн тулд бичсэн үсгийн каарт авч явж, түүнийгээ гаргаж харах". 

"Жишээ нь гадаад хэл сурч буй бол 3 янзын сурах бичгийг нэг нэг удаа унших  биш 1 сурах бичигт 3 удаа ажиллах. Мөн өмнөх жилүүдийн шалгалтанд ирсэн асуултын материал дээр ажиллах".

"Ингэж хичээллэхдээ эхлээд 3 удаа уншина. Эхний удаад зүгээр л нэг гүйлгэж харах. 10 хувийг нь л ойлгоход хангалттай. Хоёрдахь удаагаа уншихдаа цээжлэхэд, тогтооход хэцүү гэснийгээ түүж унших. Ойлголтын явц 50 хувь. Гуравдахь удаагаа уншихдаа чухал бөгөөд тогтооход хэцүү хэсгийг түүж унших. 80 хувийг нь ойлгох. 

Мөн ингэж уншихдаа 3 өнгийн балаар доогуур нь зурах. 3дахь удаагаа уншилтаар хэцүү гэснийгээ улаанаар зурах гэх мэт".

"Тархиндаа хадаж, тогтоохын тулд бичих нь чухал. Чанга дуугаар уншиж бичвэл бүр сайн. Цэвэр бичих шаардлагагүй, цээжилсэн гэж үзвэл хаях. Заавал дэвтэрт бичих гэлгүй, гарт тааралдсан цаасан дээр бичээд, цээжилсэн гэж үзвэл хаях. Улаан өнгөөр бичих зүгээр. Тархинд илүү нөлөөлж үлдэц сайтай байдаг. Унтахаасаа өмнө цээжлэх, унтаж байх хооронд тархи түүнийг боловсруулж байдаг. Мөн дүрсжүүлж цээжлэх, төсөөлж тогтоох гэх мэт". 

Энэ ном нь өмнөх номтойгоо адил бизнес хүмүүст зориулж бичсэн ном шүү. Ирээдүйд бизнес эмэгтэй ч болох юм билүү тйим ээ? Ерөөл бат оршиг.

За тэгээд англи хэл хэрхэн сурах тухай гэх мэт байсан. Орчин үед энэ талаар маш их мэдээлэл бий учраас орхилоо. 

Түр баяртай, бүгдэд нь амжилт, хайр хүсье.

Гүйгээд л

Гүйгээд л байна. Ажил гэр, гэр ажил, эмнэлэг ажил гэр, сургууль ажил гэр, цэцэрлэг ажил гэр. Дэлгүүр хоршоо ажил гэр...

Ээжийн, эхнэрийн, хувь хүний минь ажил нэг цаг дор давхцаад завгүй л байна. Ингэж гүйснээрээ би нь жин хаяхгүй юм. Эсрэгээрээ улам нэмэгдээд. 

Бодвол стресснээс үүдэлтэй байх тийм үү? Эндээ яаж стрессдээд байгаагаа нэг их бичихгүй ч жижиг сажиг юманд бас л бухимдах зүйл байна байна. 

Бага зулзага орой нь зүв зүгээр байж байснаа шөнө бөөлжөөд эхлэв. Шөнөжингөө бөөлжис цэвэрлэж хонов. Нойр дутуу. 

Маргааш нь маш чухал ажил давхцсан тул эгчтэй нь үлдээгээд явлаа. Чухал ажил минь бүхэл бүтэн 4 цаг гаран хүлээх байсан тул баахан ном авч яваад, 2-г нь дуусгав. 

Үдээс хойш ажилдаа явав. Утас хангинав. Эгч гараа хутгаар зүсэв, цус нь тогтохгүй байна гэв. 

Бага зулзагын халуун нэмэгдэв. Хоолны дуршил огт байхгүй, шингэн бага багаар уулгав. 

Үдээс хойш багыгаа эмнэлэгт үзүүлж эм авав. Эгчийг хуруугаа үзүүлэх үү? гэсэн үгүй л гэсэн. Аавд нь зураг дараад үзүүлсэн чинь инээгээд л байсан. "ирээдүйн алдартай эмч хүний хурууг баллахаа шахаж" гэсэн. 

Тэр өдөртөө бага зулзага юу ч идээгүй, эмч ч шахаад хэрэггүй гэсэн. Би ч өлсөхийн гайхамшгийг уншиж мэдсэн тул хүчлээгүй. Хань ижил 0 шөл хийж өгөхгүй юм уу л гээд байсан. Үгүй ээ л гээд гүрийсэн.

Оройхон нь нэг япон хүн ирж уулзсан. Баахан л даатгал энэ тэр ярьсан. 

Өө хамгийн чухал ажлаа хэлэхээ мартаж. "Амьжиргаа цагаан" машинаа үзлэгт хамруулж тэнцүүлсэн. Би өөрөө жолоодсон. Хань ижил хүндэтгэх шалтгаантэй болчихоод надад энэ ажил тунаж үлдчихээд...

Анх удаагаа амьжиргаа цагаан машиныг жолоодов. Хөдөөний эмээ өвөө нар л унадаг гэсэн ойлголттой, тэрэндээ бат итгэчихсэн хүн шүү дээ би. Бодоод байсан би өөрөө хөдөө амьдардаг юм байна аа. Хо хо. Ирээдүйд хөдөөний эмээ болох юм байна аа, бодоод байсан чинь. Ккк. 

Санаа нь бол час улаан спорт машин унаад, толгойндоо алчуур зангидаад давхиулсан л эмээ болмоор байдаг, ха ха.

Монгол руу аавдаа их л додьгор тэнцүүлчихлээ, ямарав дээ? гэсэн шоолоод нохой хамартаа хүрэхээр усч гэсэн. Хэ хэ. 

Юун сүртэй юм гэж бодож байна уу? Сүртэй сүртэй, иймэрхүү ажилд би ерөөсөө оролцдоггүй юм. Яахав хаа нэгтээ мөнгө төгрөгийг нь бол очиж тушаадаг л даа. 

За хүүхэд л эрүүл саруул байгаасай, бусдаар ч тэгээд болох биз ээ? 

Түр баяртай. Бүгдэд нь хайр, амжилт хүсье.

Үлгэр дуустал хайрлана

 

За ойрд юм л бол ном барьж авч байна. Юун төлөө баахан ном худалдаж аваад, хүмүүст төвөг удаж нааш нь зөөлөө дөө. Гэснээс дахин баахан ном ирнэ. Наашаа ирэх хүмүүсийн тухай сураг сонсвол шууд л хэн хэнтэй найз байна гэж нүүрномноос хайж байгаад л дундын найзуудаасаа гуйдаг болсон. Хо хо.

"Сэргэлээн хүүхээн шүү". Яг энэ мөрийг та нар кинонд гардаг хэсгээр нь уянгалуулж хэлээрэй. Хэ хэ.

Хэтэрхий сэргэлэнтээд байгаад уучлаарай, мөн маш их баярлалаа. Буянаа нэм.

Энэ "Үлгэр дуустал хайрлана" номыг Монгол дахь дүүдээ эрхлээд нэг номны оронд бэлгэнд авсан. Х.Болор-Эрдэнэ зохиолчийн хэд хэдэн номыг уншсан. Бүгд тун догь. Блог нь ч амттай байсан. Бич гэж хэлмээр л байдаг. 

Сентиметаль зохиол гэсэн. Би энэ гадаад үгийг мэддэггүй ээ. Толь бичгээс харж мэдэж авлаа. 

Англи, япон, монгол гэж хайж үзэв. Эмзэг, мэдрэмтгий, уян, дэврүүн гэх мэт олон утгатай юм байна тийм үү? 

Тэгээд яг сентименталь зохиол гэж ийм зохиолыг хэлдэг юм байна ч гэж мэдэж авлаа. Баярлалаа. 

Сэтгэцийн эрүүл мэнд маш чухлыг би өнгөрдөг жил ойлгосон шүү. Их ойрын хүний сэтгэл хямраад, маш тайван бус, маш сонин сонин үйлдэл гаргаад, бусдын сэтгэлд сэв хийх үг хэлээд...

Эхэндээ гайхаад, яагаад тэгж аашлаад байгааг нь мэдэхгүй. Тэгсэн нэг япон хүүхэн сэтгэл санааны, сэтгэцийн өвчин байх гэж хэлэхээр нь нээрээ юу билээ? гэж бодон тийм өвчны талаар уншсан. 

Тоохгүй орхигдуулбал маш их хор хөнөөлтэй, уг хүндээ ч, эргэн тойрныхондоо ч...

Үлгэр, Тусгал, Хүрмэн, Гэхдээ, Инээмсэглэл, Чагт, Хавар, Зун, ээж эмээ, охин, аав, хойт аав, хамаатан, шөнө дөлөөр хээр гадаа оролддог хамаатны ах, морины хүүхдүүд, үсчний газрын солонгос эзэн, аарц...

Үнэхээр аймшигтай дүр зураг, уншиж байх явцад нэг тийм айдастай, түгшүүртэй байсан. Яах бол? Зэвүүн юм бэ? гэж бодон бодон уншина. Хамгийн гол нь бодит амьдралаас сэдэвлэсэн гэхээр бас л аюумшигтай нийгэмд амьдраад байна аа бид...

Мөн багадаа авсан тэр сэтгэлийн айдас, эмгэг нь үүрд ямар нэгэн байдлаар бидэнд нөлөөлөөд, дагаад байдаг гэж бодохоос надад ч бас тийм нэг айдас, хүйдэс, мэдрэмж байдаг л байх...

Эмчлүүлмээр санагдав...

Гол баатар Үлгэр бүсгүй сэтгэлд нь бах бөх шингэчихсэн тэр нэгэн айдаснаасаа салах гэж эмчид хандан, мартахыг хүссэн, мартагдсан дурсамжуудаараа аялан, жаахан бяцхан охиноос уучлал эрэн буй тухай гарна. 

Алсдаа бүх зүйл сайхан болж, ээж, нийгэмд өөрийн гэсэн байр суурьтай бүсгүй болно. Гялалзана. 

Энэ л их сайхан байлаа. 

Маш их таалагдсан мөртөө бичлээ. Бусдад өгч болно гэхдээ өөртөө үлдээ гэдгийг нэлээд олон жилийн өмнө мэдэрч, амсаж билээ. Юутай үнэн үг вэ гэж бодон шар өнгөөр тодруулаад, цаас наасан. Эндээ ч бас бичлээ. 

"Бусдад өг. Гэхдээ өөртөө ч бас үлдээ. Бусдыг сонс. Гэхдээ өөрөө ч бас ярь. Бусдыг хайрла. Гэхдээ өөрийгөө бүү дэвсэл".

Амтархан, салалгүй, цаашид яах бол гэж бодон бодон хоёрхон хоногт уншсан зохиол байлаа. Ер нь зохиолчийн зохиолууд тийм, төгсгөлийг нь хурдхан шиг мэдмээр санагдаад, асар богино хугацаанд уншдаг, хэзээ ч уйдаадаггүй.

Бодит амьдралаас сэдэвлэсэн болохоор би ч бас үсчин Үлгэрт толгойгоо угаалгаж үзмээр санагдав. Тэр бүр үсчин ороод байдаггүй тул үсчинд толгойгоо угаалгаж буйгаар өөрийгөө төсөөлөн төсөөлөн уншив.  

Мөн зохиолчийн хань ижил Б.Эрдэнэсолонгынх нь бичсэн шүлэг таалагдсан. Нэг тийм даруухан хэрнээ час хийсэн шүлэг бичээд байдаг тийм ээ? 

Хойшид ч Х.Болор-Эрдэнэ зохиолчийн шинэ зохиолыг гарсан даруйд нь ямар зохиол болсон бол гэж эргэлзэж тээнэглэзэлгүй захиалж унших болно. 

Түр баяртай, бүгдэд нь амжилт болон хайрыг хүсье. 

Хайтани Кэнжиро 2

Хүүхдийн зохиолч Хайтани Кэнжирогийн номнуудаас зээлж уншиж байгаа хажуугаар нь. Хүүхэд багачуудад зориулсан тул нэг их цаг авахгүй. Үг хэллэг, ханз, агуулга нь ойлгомжтой. 

Гэхдээ ярианы хэллэгээх бичигдсэн байсан энэ хоёр ном. Чангаар уншихад жаахан хэцүү байсан шүү. Хи хи. 

Японоор уншиж сурмаар байгаа хүмүүст зөвлөхөд агуулга нь хүнд, үг хэллэг нь хэцүү, ханз ихтэй номноос илүүтэйгээр хүүхдэд зориулсан номноос эхлээрэй гэж зөвлөдөг. 

Яараад, шууд л хүнд ном барьж авбал шантрах нь ч хурдан шүү гэдэг. 

Би чинь сонгодог ном зохиолоос нь уншихаасаа илүү зулзагууддаа зурагт ном, үлгэр голцуу уншиж өгдөг байлаа шүү дээ. Сүүлийн үед л өөртөө зориулж зээлж нэг, худалдаж авч нэг ном уншдаг боллоо шүү дээ. 

Цэцэрлэгийн хүүхдүүийн ангидаа гаргадаг ааш авир, үйлдэл, хоорондын яриаг бичсэн байсан. Хөөрхөөн, бага зулзага нүдэнд харагдаад л байсан. Мань хүн бас нэг иймэрхүү "пээдийдэг" байх даа гэж бодохоор өөрийн эрхгүй инээмсэглэл тодорно. Хи хи. 

Ямартай ч бага зулзага өөрөө хоолоо халбагадаж идэх нь ховор гэх шиг болсон. Тавагтайгаа хараад л суугаад байдаг, сүүлдээ багш нь халбагадаж өгөхөөр идчихдэг гэсэн. 

Яалтай?

Чихиро багш нь залуухан хөөрхөн багш. Чихиро багшийгаа ирээгүй өдөр цаанаа л нэг гомдолтой "Чихиро багш өнөөдөр ирээгүй, амарсан" гэж хэлдэг. 

Тэгсэн энэ номд нэг хөөрхөн хүү багштайгаа хуримлана гээд, ирээгүй хэдэн өдөр нь хуримынхаа аялалд явчихсан гээд уурлаад, хардаад байвал яах уу? Ха ха. 

Тэгсэн ханиад тусаад билүү дээ, өвдөөд амарсан байдаг. Уужраад байгаа юм биш үү? Жаал хөвүүн. Хи хи. 

Дунд зулзага ангийнхаа нэг эрэгтэй багшид хайртай байж билээ. Бараг бүх охид сайн байсан байх шүү. Ха ха. Шилжээд явчихсан. Хаа нэгтээ дэлгүүрт таарахаар ичээд байдаг одоо. Ккк. 

Тэгсэн хөвгүүд чинь хөөрхөн эмэгтэй багшийгаа бас амар байлгадаггүй бололтой дог шүү. Нэг их удахгүй л найз охинтой болчихсон явах байх даа гэж. Тэр үед ээж хүүгээ харамлаад бөөн юм болох байх даа...

За нэг иймэрхүү нэг номыг ч зүгээр уншчихгүй, элдэв юм хамж шимж боддог болж дээ. Ай хорвоо...

Бага ангийн 1, 2, 3, 4, 5 дугаар ангийнханд зориулж бичсэн номыг нь бас зээлж уншина даа. Торолгүй уншчихаар өөртөө итгэх итгэл ч төрнө. Ха ха. 

За түр баяртай. Бүгдэд нь хайр болон амжилтыг хамтад нь хүсье.